پاکستان تحریک انصاف (پی ٹی آئی) کے رہنما فواد چوہدری نے کہا ہے کہ شجاعت حسین اگر ہم سے ہاتھ ملا لیں تو ان کا فائدہ ہے۔

تفصیلات کے مطابق پی ٹی آئی کے رہنما فواد چوہدری نے پریس کانفرنس کرتے ہوئے کہا کہ رانا ثناءاللہ معیشت پر لیکچر نہ دیا کریں، یہ تو ایسے ہی ہے کہ نریندر مودی برداشت پر لیکچر دیں، 8 ماہ میں ملکی معیشت کے ساتھ جو ہوا لوگوں کو پتہ ہے، اسحاق ڈار اور مفتاح اسماعیل کے لیکچر سن لیں پتہ لگے گا کس نے معیشت خراب کی۔

ہمارے دور میں دہشت گردی نہ ہونے کے برابر تھی

فواد چوہدری نے کہا کہ ہمارے دور میں دہشت گردی نہ ہونے کے برابر رہ گئی تھی، افغانستان میں جو ہو رہا ہے اس کی قیمت پاکستان کو ادا کرنی پڑ سکتی ہے۔

60 فیصد کابینہ پر کرمنل ریکارڈ درج ہیں

ان کا کہنا تھا کہ بلاول بھٹو اتنے دورے آخر کس کے پیسوں سے کر رہے ہیں، 60 فیصد کابینہ پر کریمنل مقدمات ہیں، انتخابات کے بغیر پاکستان میں استحکام نہیں آئے گا، جب بھی آنے کا اعلان کرتے ہیں قومی اسمبلی کا اسپیکر بھاگ جاتا ہے، یہ بڑھکیں مار رہے تھے اسمبلیاں توڑیں الیکشن کرا دیں گے، اسمبلیاں تحلیل کرنے کا اعلان ہوا تو چوہوں کی طرح بھاگ گئے۔

مزید پڑھیں؛ پی ڈی ایم کے لیڈر عوام کے سامنے ولن کی حیثیت رکھتے ہیں، فواد چوہدری

انہوں نے کہا کہ عمران خان نے پنجاب کی قیادت کا اجلاس کیا جس میں انہوں نے فیصلہ کیا ہے کہ وزیر اعلیٰ کا اعتماد کا ووٹ لینے جا رہے ہیں، آج ایک وفد پرویز الٰہی سے ملاقات کرے گا جس میں ہم تاریخ طے کریں گے، ہمارے پاس 187 اراکین اسمبلی ہیں، اگلی سماعت سے قبل ہی اعتماد کا ووٹ لیا جائے گا۔

شجاعت حسین اور آصف زرداری کی ملاقاتوں کا کوئی فائدہ نہیں ہو گا

فواد چوہدری کا یہ بھی کہنا تھا کہ ہم نے تاریخ طے کر لی ہے لیکن پرویز الٰہی سے مشورہ ضروری ہے، شجاعت حسین کو ہمارے ساتھ ملاقات کا فائدہ ہو گا، شجاعت حسین اور آصف زرداری کی ملاقاتوں کا کوئی فائدہ نہیں ہو گا۔