گورنر پنجاب نے کہا ہے کہ مسلم لیگ (ن ) قانون اور آئین کی بالادستی پر یقین رکھتی ہے۔

تفصیلات کے مطابق گورنر پنجاب محمد بلیغ الرحمان نے گورنر ہاؤس میں یوم قائد اور کرسمس کی مناسبت سے تقریب سے خطاب کرتے ہوئے کہا کہ بانی پاکستان قائد اعظم محمد علی جناح نے ہمیشہ آئین اور قانون کی بالادستی کی بات کی۔

انہوں نے کہا کہ ملک کی ترقی اور استحکام کے لیے ضروری ہے کہ اقلیتوں کو ساتھ لیکر چلیں،ملک میں قانون اور آئین کی بالادستی ہوگی تو ملک آگے بڑھے گا۔

گورنر پنجاب نے یہ بھی کہا کہ محمد نواز شریف نے ملک کو موٹر ویز ، ہسپتال، تعلیمی ادارے اور ناقابل تسخیر دفاع دیا، سی پیک جیسے منصوبے کو ملک میں فروغ دیا جبکہ ملک کو طویل  گھنٹوں کی لوڈ شیڈنگ سے نجات دلائی۔

مزید پڑھیں؛ گورنر پنجاب نے اسپیکر پنجاب اسمبلی کی رولنگ مسترد کردی

گورنر پنجاب کا کہنا تھا کہ قائد اعظم کی ولولہ انگیز قیادت کی وجہ سے ایک آزاد مملکت کا حصول ممکن ہوا، قائد اعظم کے رہنما اصول ایمان،اتحاد تنظیم ہمارے لیے مشعل راہ ہیں۔

ان کا یہ بھی کہنا تھا کہ مسلم لیگ (ن ) قانون اور آئین کی بالادستی پر یقین رکھتی ہے، وفاقی حکومت میں جو تبدیلی آئی وہ بھی آئینی طریقے سے آئی ہے، آئین و قانون کی حکمرانی ہوگی تو ملک آگے بڑھے گا۔

انہوں نے کہا کہ وزیراعلیٰ کو آئینی اختیارات استعمال کرتے ہوئے کہا کہ اعتماد کا ووٹ لیں، آئینی اختیار کرتے ہوئے وزیر اعلیٰ کو  ڈی نوٹی فائی کیا گیا، عدالت کے فیصلے کا احترام کریں گے۔

گورنر پنجاب محمد بلیغ الرحمان نے مزید کہا کہ پی ڈی ایم نے آئینی حق استعمال کرتے ہوئے ملک کو بحرانوں سے بچانے کے لیے حکومت بنانے کا فیصلہ کیا ہے۔