گورنر سندھ کامران خان ٹیسوری نے کہا ہے کہ ہمیں دشمن کی ہر سازش کو اپنے اتحاد سے ناکام بنانا ہوگا۔

تفصیلات کے مطابق گورنر سندھ کامران خان ٹیسوری نے جامعتہ الرشید کا دورہ کیا اور وہاں انہوں نے گفتگو کرتے ہوئے کہا کہ جامعتہ الرشید میں دوبارہ مدعو کرنے پر مفتی عبدالرحیم کا مشکور ہوں جبکہ مفتی عبدالرحیم اور جامعہ کی انتظامیہ ہر شعبہ کے احسن انتظام پر مبارکباد کی مستحق ہے۔

انہوں نے کہا کہ الغزالی یونیورسٹی طالب علموں کو اعلیٰ تعلیم کے بہتر مواقع فراہم کرے گی جبکہ الغزالی یونیورسٹی کے چارٹر میں میرے دستخط کا ہونا انتہائی سعادت کی بات ہے اور جامعتہ الرشید میں دینی اور عصری تعلیم کا امتراج اسے ایک ممتاز و منفرد درس گاہ بناتا ہے۔

یہ بھی پڑھیں؛ کراچی کی بہتری کے لئے سب کو مل کر اقدامات کرنے ہیں، کامران ٹیسوری

ان کا کہنا تھا کہ ہمیں دشمن کی ہر سازش کو اپنے اتحاد سے ناکام بنانا ہوگا اور اس ضمن میں علما کرام کا کردار نہایت اہمیت کا حامل ہے۔

ان کا یہ بھی کہنا تھا کہ جامعتہ الرشید کے 40 شعبے دینی تعلیم کے فروغ میں اہم کردار ادا کررہے ہیں، کراچی انسٹیٹیوٹ آف مینجمنٹ اینڈ سائنسز سے بھی بہترین پروفیشنلز سامنے آرہے ہیں۔

یہ بھی پڑھیں؛ ہر شخص کو برابری کے ساتھ زندگی گزارنے کا حق حاصل ہے، کامران ٹیسوری

گورنر سندھ کامران خان ٹیسوری نے مزید کہا کہ مفتی عبدالرحیم کے سینکڑوں شاگرد پورے پاکستان میں دین کی روشنی پھیلارہے ہیں جبکہ جامعتہ الرشید میں جدید ترین ٹیکنالوجی کا استعمال بھی لائق تحسین ہے اور میری کوشش ہوگی کہ جامعتہ الرشید کے تمام منصوبوں میں مکمل مدد اور تعاون کروں۔