وزیر اعلیٰ سندھ سید مراد علی شاہ نے کہا ہے کہ سندھ کے 23 اضلاع  کو سیلاب نے بُری طرح متاثر کیا ہے۔

تفصیلات کے مطابق یواین ریزیڈنٹ اینڈ ہیومنیٹیرین کوآرڈینیٹر مسٹر جولین ہارنیس کی وزیراعلیٰ سندھ سید مراد علی شاہ سے ملاقات ہوئی ہے جس میں سندھ کی سیلاب کی موجودہ صورتحال  پر بات چیت کی گئی ہے۔

اس موقع پر وزیر اعلیٰ سندھ سید مراد علی شاہ نے کہا کہ سندھ کے 23 اضلاع  کو بارش اور سیلاب کی آفت نے بُری طرح متاثر کیا ہے، 557 پکے گھر اور 13 لاکھ کچے مکانات کو نقصان پہنچا ہے جبکہ گھروں کی تعمیر کے لیے 570 بلین روپے کی ضرورت ہے۔

انہوں نے کہا کہ لوکل گورنمنٹ کی تباہ شدہ سڑکوں کے لیے 16.52 بلین، اسکولوں کے لیے 97.848 بلین اور آبپاشی  کے لیے 21.93 بلین روپے کی ضرورت ہے۔

وزیر اعلیٰ سندھ سید مراد علی شاہ نے کہا کہ پبلک ہیلتھ انجینئرنگ، واٹر اینڈ سینیٹیشن  کے لیے 9.87 بلین روپے اور لوکل گورنمنٹ کی سینیٹیشن اور واٹر اسکیم کی بحالی کے لیے 53054 بلین روپے کی ضرورت ہے۔

 اس موقع پر مطابق یواین ریزیڈنٹ اینڈ ہیومنیٹیرین کوآرڈینیٹر مسٹر جولین ہارنیس نے کہا کہ ڈونر کانفرنس  کے ذریعے سندھ کے متاثرین  کی بحالی  کے لیے اچھی مدد کی توقع ہے۔

اجلاس میں فیصلہ ہوا  کہ یو این 10 جنوری کو جینوا میں ڈونر  کانفرنس منعقد کر رہی ہے جبکہ کانفرنس میں سندھ حکومت اپنا کیس بھی پیش کرے۔

وزیراعلیٰ سندھ نے پی اینڈ ڈی کو کانفرنس کے لیے سندھ میں متاثرین  کی بحالی کے حوالے سے ڈیٹا مرتب کرنے کی ہدایت بھی دی۔

ملاقات میں چیف سیکریٹری، چیئرمین پی اینڈ ڈی، سیکریٹری لوکل گورنمنٹ، پی ایس سی ایم، سی ای او اور پیپل ہائوسنگ کمپنی شامل تھے جبکہ اقوام متحدہ  کے وفد میں یو این ڈی پی کے ریزیڈنٹ  ریپریزینٹیٹیو مسٹرنٹ اوسٹ بے، عمران  لغاری اور عامر خان بھی شامل تھے۔