گورنر سندھ کی جانب سے ایس ایس جی سی کو صارفین کو گیس کی فراہمی یقینی بنانے کی ہدایات جاری کردی گئیں ہیں۔

تفصیلات کے مطابق گورنر سندھ کامران خان سے سوئی سدرن گیس کمپنی لمیٹڈ کے مینیجنگ ڈائریکٹر عمران منیار کی ملاقات ہوئی ہے۔

ملاقات کے دوران شہریوں کو گیس کی بلا تعطل فراہمی،گیس پریشر کو یقینی بنانے،اور دیگر متعلقہ امور پر تبادلہ خیال  کیا گیا جبکہ گورنر سندھ نے سوئی سدرن گیس کمپنی لمیٹڈ کی کارکردگی پر ناراضگی کا اظہار بھی کیا۔

یہ بھی پڑھیں: ملک بھر میں گیس کی بدترین لوڈ شیڈنگ جاری

اس موقع پر کامران ٹیسوری کا کہنا تھا کہ شہریوں کی گیس لوڈ شیڈنگ اور کم پریشر کی شکایات 100 فیصد درست ہیں، ہر سال سریوں میں گھریلو صارفین کو گیس کی قلت کا کیوں سامنا کرنا پڑتا ہے، اس مسئلہ کا دیرپا حل تلاش کیوں نہیں کیا جاتا  ہے۔

انہوں نے ہدایت جاری کرتے ہوئے کہا کہ گھریلو اور صنعتی صارفین کو گیس کی متواتر فراہمی کو یقینی بنایا جائے۔

اس موقع پر ایم ڈی نے اپنی مجبوریاں بتائیں جسے گورنر سندھ نے مسترد کرتے ہوئے سوئی سدرن کو کارکردگی بہتر بنانے کی ہدایت کی اور کہا کہ وفاقی وزیر مصدق ملک اور دیگر متعلقہ حکام سے بھی بات کروں گا۔

کراچی میں گیس کی غیر اعلانیہ لوڈشیڈنگ کا سلسلہ

سردی کا موسم شروع ہوتے ہی کراچی کے کئی علاقوں میں گیس کی غیر اعلانیہ اور طویل لوڈشیڈنگ نے شہریوں کو مشکلات سے دوچار کر دیا ہے۔

کراچی کے مختلف علاقوں کے رہائشیوں کو چولہے میں گیس کی غیر اعلانیہ لوڈشیڈنگ یا انتہائی کم پریشر کا سامنا ہے۔

لانڈھی، نارتھ کراچی، گلستان جوہر، گلشن اقبال، نارتھ ناظم آباد کو گیس کی فراہمی گزشتہ روز سے مکمل طور پر معطل رہی۔

یہ بھی پڑھیں: سوئی سدرن گیس کی غفلت ، عوام مزید مشکلات سے دوچار

گیس لوڈشیڈنگ سے شدید متاثر ہونے والے دیگر علاقوں میں سرسید ٹاؤن، نیو کراچی، ناگن چورنگی، اورنگی ٹاؤن، ریلوے کالونی، راشد منہاس روڈ، فیڈرل بی ایریا، گڈاپ اور کاٹھور شامل ہیں۔

مکینوں کا کہنا تھا کہ گیس بہت کم وقت سے فراہم کی جارہی ہے جس کے باعث کھانا پکانا مشکل ہوگیا ہے۔

واضح رہے کہ گیس کی طلب 1250 ایم ایم سی ایف ڈی سے زائد ہے جبکہ سوئی سدرن گیس کمپنی (ایس ایس جی سی) صوبے کو 900 ایم ایم سی ایف ڈی سے کم گیس فراہم کر رہی تھی۔

اس سے قبل نومبر میں صوبائی وزیر توانائی امتیاز احمد شیخ نے کہا تھا کہ گیس اور بجلی کی تقسیم میں سندھ کے ساتھ ناانصافی ہو رہی ہے اور وفاقی حکومت پر زور دیا کہ وہ مسائل حل کرے۔

 امتیاز احمد شیخ نے وزیر مملکت برائے پیٹرولیم مصدق مسعود ملک کو خط لکھ کر گیس اور بجلی کی تقسیم اور اس کے مطالبات کی تکمیل میں ’سندھ کے ساتھ ناانصافی‘ پر تشویش کا اظہار کیا تھا۔