قومی توانائی بچت پلان کی منظوری کیلئے وفاقی کابینہ کا اجلاس آج طلب کرلیا گیا ہے۔

تفصیلات کے مطابق وزیراعظم شہباز شریف کی زیر صدارت وفاقی کابینہ کا اجلاس آج بلایا گیا ہے جس میں وفاقی وزراء سمیت تمام وزرائے اعلیٰ کو بھی مدعو کیا گیا ہے۔

دوران اجلاس وفاقی کابینہ قومی توانائی بچت پلان کا جائزہ اور منظوری دے گی  جبکہتوانائی ڈویژن کی جانب سے پلان پر کابینہ کو تفصیلی بریفنگ دی جائے گی ۔

یہ بھی پڑھیں: توانائی کے شعبے کا گردشی قرضہ بلند ترین سطح پر پہنچ گیا

خیال رہے کہ وفاق کی جانب سے پیٹرولیم مصنوعات کے امپورٹ بل میں نمایاں اور واضح کمی کی منصوبہ بندی، بجلی چوروں کے خلاف کریک ڈاؤن سمیت نجی اور سرکاری عمارتوں کو شمسی توانائی پر منتقل کرنا بھی پلان کا حصہ ہے۔

وفاقی حکومت کا صوبائی حکومتوں کے ساتھ ملکر قومی توانائی بچت پلان پر عملدرآمد کا منصوبہ بنایا گیا ہے اور اسی منصوبے کے تحت وزرائے اعلی کو بھی وفاقی کابینہ کے اجلاس میں شرکت کی خصوصی دعوت  دی گئی ہے۔

حکومت توانائی کے شعبے کے مسائل کو حل کرنے کے لیے کوشاں ہے

 وفاقی وزیر خزانہ اسحاق ڈار کی زیر صدارت توانائی کے شعبے میں اصلاحات کے حوالے سے اجلاس ہوا جس میں توانائی کے شعبے میں مختلف اصلاحات متعارف کرانے، اسٹاک اور گردشی قرضہ کے مسائل پر گفتگو ہوئی۔

یہ بھی پڑھیں: پاکستان کو ماحول دوست توانائی کی ضرورت ہے، مصدق ملک

اجلاس میں متعلقہ حکام کو ہدایت کی گئی کہ وہ فوری توانائی کے مسائل کا قابل عمل حل نکالیں۔

وزیر خزانہ نے اس موقع پر کہا کہ ملک کی اقتصادی ترقی کے لیے توانائی کے شعبے میں اصلاحات ناگزیر ہیں، حکومت توانائی کے شعبے کے مسائل بشمول گردشی قرضے کو حل کرنے کے لیے کوشاں ہے۔

اسحاق ڈار نے مزید کہا کہ توانائی کے شعبے کو مالی  طور پر مستحکم کیے بغیر ملک کی اقتصادی ترقی نہیں کی جا سکتی۔