مرکزی ترجمان پیپلز پارٹی شازیہ مری نے کہا ہے کہ پاکستان پیپلزپارٹی آج بھی شہید بینظیر بھٹو کے مشن پر گامزن ہے۔

تفصیلات کے مطابق مرکزی ترجمان پیپلز پارٹی شازیہ مری کا شہید محترمہ بینظیر بھٹو کی 15ویں برسی پر ویڈیو پیغام جاری کرتے ہوئے کہا کہ 27 دسمبر محترمہ شہید بینظیر بھٹو کی 15ویں برسی کا دن ہے اور ہم محترمہ شھید بینظیر بھٹو کو اس دن خراج عقیدت اور خراج تحسین پیش کرتے ہیں۔

انہوں نے کہا کہ محترمہ بینظیر بھٹو نے پاکستان کے اندر جمہوریت اور آئین کی بالادستی کیلئے بہت جدوجہد کی ہے جبکہ محترمہ بینظیر بھٹو کی جدوجہد کا محور جمہوریت، انسانی اور معاشی حقوق تھے اور شھید بینظیر بھٹو نے بہادری سے دہشتگردی کا مقابلہ کرتے ہوئے اپنی جان کا نظرانہ بھی پیش کیا ہے۔

   ان کا کہنا تھا کہ پاکستان پیپلزپارٹی آج بھی شھید بینظیر بھٹو کے مشن پر گامزن ہے اور بی آئی ایس پی پروگرام بینظیر بھٹو شھید کے نام سے منسلک ہے۔

یہ بھی پڑھیں؛ سب کو ملکر اظہار یکجہتی کے لیے کھڑا ہونا پڑے گا، شازیہ مری

شازیہ مری نے کہا کہ بینظیر انکم سپورٹ پروگرام کا خواب شہید بینظیر بھٹو نے دیکھا تھا اور وہ چاہتی تھی کہ غریب ترین گھرانوں کو ایسی مدد فراہم کی جائے تاکہ وہ معاشرے کے اندر باعزت زندگی بسر کریں۔

انہوں نے کہا کہ آصف علی زرداری نے شہید رانی کے امنگوں کے مطابق لاکھوں خاندانوں کی کفالت کا پروگرام بنایا اور آج بینظیر انکم سپورٹ پروگرام سے 8.5 ملین غریب خاندانوں کی مالی معاونت کی جارہی ہے۔

ان کا کہنا تھا کہ شہید بینظیر بھٹو کا مشن ابھی پورا نہیں ہوا ہے کہ جس کے تحت پاکستان ترقی کے اونچایوں کو چھوئے گا۔

یہ بھی پڑھیں؛ بلاول بھٹو اپنے نانا شہید اور والدہ شہید کے فلسفے پر گامزن ہیں، شازیہ مری

ان کا یہ بھی کہنا تھا کہ شہید رانی کا مشن پاکستان کو اقتصادی، سماجی اور سیاسی طور پرمضبوط دیکھنا تھا اور آج چیئرمین پیپلزپارٹی بلاول بھٹو زرداری دنیا بھر میں شہید بینظیر بھٹو کا مشن لیکر آگے بڑھ رہے ہیں۔

مرکزی ترجمان پیپلز پارٹی شازیہ مری نے مزید کہا کہ آئین سب ملکر ایک بار پھر اس عزم کودہرائیں کہ ہمیں پاکستان کو ترقی یافتہ ملک بنانا ہے۔