وفاقی وزیر مواصلات اسعد محمود نے کہا ہے کہ ہماری کوشش ہے کہ بلوچستان میں سڑکوں کا جال بچھائیں۔

تفصیلات کے مطابق وفاقی وزیر مواصلات اسعد محمود نے این ایچ اے میں میڈیا سے گفتگو کرتے ہوئے کہا کہ سیلاب کی تباہ کاریوں کے بعد سندھ اور بلوچستان میں این ایچ اے نے عوام کی مشکلات کم کرنے میں کوشش کی، کہیں مواصلاتی نظام معطل ہوتا تھا تو 24 گھنٹے کے اندر بحال کرنے کی کوشش ہوتی تھی، مواصلاتی نظام کے ساتھ خوراک ادویات کی فراہمی میں بھی این ایچ اے نے کردار ادا کیا۔

اسعد محمود نے کہا کہ سیلاب کے بعد این ایچ اے اب ملک بھر میں تعمیرنو پر کام شروع کر رہا ہے یعنی جو میگا پروجیکٹس بند ہوئے اب ان ہی پروجیکٹس کا 9 دسمبر کو افتتاح کرینگے، خیبرپختونخوا سے ژوب تک موٹروے پر ٹینڈر آخری مرحلے میں ہے، نواز شریف کے دور کے بعد رکنے والے منصوبے پھر شروع کر رہے ہیں، گوادر ایئرپورٹ پر بھی تعمیر کا کام اگلے سال مکمل ہو جائیگا۔

ان کا کہنا تھا کہ چھوٹے سے ٹینڈر کو پاس کرنے میں بھی 2 تین ماہ لگ جاتے ہیں، پرسوں سکھر سے حیدرآباد موٹروے کا افتتاح کرنے جا رہے ہیں، حکومت کا فیصلہ ہے سی پیک کے تمام روکے ہوئے منصوبوں پر کام ہو گا، ملک میں ترقیاتی بجٹ 700 ارب ہے جس میں سے سیلاب زدہ علاقوں کو بھی فنڈ دیا، سیلاب متاثرہ کو 25 ہزار کی مد میں بڑی رقم دینی پڑی اور وزیراعظم کی ہدایت پر این ایچ اے نے ایمرجنسی میں 20 ارب روپے خرچ کیے۔