ایڈمنسٹریٹر کراچی ڈاکٹر سید سیف الرحمٰن نے کہا ہے کہ تمام بلدیاتی اداروں کے ساتھ مل کر شہر کی ترقی کیلئے کام کریں گے۔

تفصیلات کے مطابق ڈاکٹر سید سیف الرحمن نے ایڈمنسٹریٹر کراچی کا چارج سنبھال لیا ہے جس کے بعد کے ایم سی بلڈنگ پہنچنے پر افسران نے ان کا استقبال کیا اور انہوں نے ایڈمنسٹریٹر کا عہدہ سنبھالنے کے بعد مختلف محکمہ جاتی سربراہان سے ملاقات بھی کی۔

اس موقع پر اپنے خیالات کا اظہار کرتے ہوئے ڈاکٹر سید سیف الرحمٰن کا کہنا تھا کہ کے ایم سی کے زیر انتظام سڑکوں کی بحالی پہلی ترجیح ہے جبکہ پارکوں کی حالت بہتر بنائیں گے اور گرین بیلٹ کو درست کیا جائے گا۔

انہوں نے کہا کہ تمام بلدیاتی اداروں کے ساتھ مل کر شہر کی تعمیر و ترقی کے لئے کام کریں گے اور تمام فٹ پاتھوں سے فوری طور پر تجاوزات کا خاتمہ کیا جائے گا۔

انہوں نے مزید کہا کہ کے ایم سی کے اسپتالوں کی حالت کو بہتر کرنے کے لئے بھر پور اقدامات کئے جائیں گے اور سابق ایڈمنسٹریٹر بیرسٹر مرتضی وہاب نے شہر کی بہترین خدمت کی ہے ان کے تعمیراتی کاموں کے تسلسل کو برقرار رکھا جائے گا۔

ان کا کہنا تھا کہ اسٹریٹ لائٹس کی درستگی کے لئے اقدامات کریں گے تاکہ شہر روشن نظر آئے۔

خیال رہے کہ گزشتہ روز پیپلزپارٹی اور ایم کیو ایم پاکستان کے درمیان ہونے والے مذاکرات کے بعد  ڈاکٹر سید سیف الرحمٰن کو کراچی کا ایڈمنسٹریٹر تعینات کرنے کا فیصلہ کیا گیا تھا جس کا بعد میں نوٹیفکیشن بھی جاری کیا گیا تھا۔

عہدہ سنبھالنے کے بعد ایڈمنسٹریٹر کراچی کی گورنر سندھ کامران ٹیسوری سے بھی ملاقات ہوئی تھی جس میں انہوں نے مبارکباد پیش کی تھی جبکہ شہر قائد کو درپیش مسائل، ان کے حل کے اقدامات اور اس ضمن میں ترجیحات پر تبادلہ خیال بھی کیا گیا تھا۔