پنجاب حکومت کی ترجمان مسرت جمشید چیمہ کا کہنا ہے کہ پاکستان تیزی سے ڈیفالٹ کی طرف بڑھ رہا ہے۔

سماجی رابطے کی ویب سائٹ ٹوئٹر پر اپنے جاری کردہ بیان میں ترجمان وزیر اعلیٰ و پنجاب حکومت مسرت جمشید چیمہ نے کہا کہ رجیم چینج آپریشن کے آفٹر شاک کا سلسلہ جاری ہے۔

پاکستان تیزی سے ڈیفالٹ کی طرف بڑھ رہا ہے. کپاس کی پیداوار 40 فیصد تک کم آ رہی ہے اور گندم کی بھی قلت کا امکان ہے. پہلے ایک زرعی ملک کو خوراک امپورٹ کرنے پر مجبور کیا گیا اور اس کے بعد زرمبادلہ کی قلت بھی پیدا کر دی گئی. سوچی سمجھی سازش کے تحت ملک کو اپاہج کیا جا رہا ہے.

— Musarrat Cheema (@MusarratCheema) December 12, 2022

انہوں نے کہا کہ کپاس کی پیداوار میں 40 فیصد کمی اور گندم کی بھی قلت کا امکان ہے، ایک زرعی ملک کو پہلے خوراک درآمد کرنے پر مجبور کیا گیا اور اب امپورٹڈ حکومت نے زرمبادلہ کی قلت پیدا کر ضروری اشیاء کی درآمد بھی بند کر دی۔

ترجمان پنجاب حکومت نے کہا کہ سوچی سمجھی سازش کے تحت ملک کو اپاہج کیا جا رہا ہے اور پی ڈی ایم کے وزراء کرپشن کے عالمی ریکارڈ بنانے میں مصروف ہیں۔

مسرت جمشید چیمہ نے کہا کہ بے تحاشا غیر ملکی دوروں کے باوجود امپورٹڈ حکومت کے وزیر خارجہ ملکی خارجہ پالیسی کو کوئی سمت نہیں دے سکے۔

پی ٹی آئی رہنما نے مزید کہا کہ سندھ میں سیلاب متاثرین بلاول بھٹو کی راہ تک رہے ہیں، وزیر خارجہ صاحب سندھ کے سیلاب متاثرین کی مفلسی پر بھی نظر ڈالیں۔

‘تکنیکی اعتبار سے ہم ڈیفالٹ کر چکے ہیں’

گزشتہ روز پاکستان تحریک انصاف (پی ٹی آئی) کے رہنما شوکت ترین نے بول نیوز کے پروگرام “تبدیلی” میں گفتگو کرتے ہوئے کہا تھا کہ ڈالر کو منجمد کیا تو 1998 سے بڑی تباہی ہوگی۔

انہوں نے کہا کہ حکومت نے مارکیٹس میں ڈالر دینا بند کردیے، ڈالر کی غیراعلانیہ قیمت 265 روپے تک پہنچ چکی ہے، تکنیکی اعتبار سے ہم ڈیفالٹ کر چکے ہیں۔

سابق وزیر خزانہ نے کہا کہ ڈالر مہنگا ہونے سے درآمدی قیمت بڑھ جائے گی، مہنگائی مزید بڑھے گی۔

شوکت ترین نے مزید کہا تھا کہ مقامی صنعتیں بند ہورہی ہیں، دوست ممالک بھی کہہ رہے ہیں کہ ہم مستحکم ممالک سے بات کریں گے۔

امپورٹڈ حکومت نے ملکی معیشت کی تباہی کے تمام ریکارڈ توڑ دیے

امپورٹڈ حکومت کی جانب سے ترقی کرتی ملکی معیشت کی تباہی کے تمام ریکارڈ توڑ دیے گئے ہیں۔

چند روز قبل سابق وزیر خزانہ شوکت ترین نے مختلف مصنوعات کی فروخت میں نمایاں کمی کے اعداد و شمار سماجی میڈیا پر جاری کر دیے تھے۔

انہوں نے کہا کہ جولائی تا اکتوبر 2022 کے فروخت اعداد و شمار کے مطابق گاڑیوں کی فروخت میں سالانہ 46 فیصد کمی واقع ہوئی ہے جبکہ پیٹرولیم مصنوعات کی فروخت میں بھی سالانہ 22 فیصد کمی ہوئی ہے۔

ان کا کہنا تھا کہ سیمنٹ کی فروخت 23 فیصد سالانہ کمی کا شکار ہو چکی ہے جبکہ ورکرز کی ترسیلات زر میں سالانہ 9 فیصد کمی ہوئی ہے اور پاور ڈسپیچ بھی 10 فیصد کم ہے۔

 انہوں نے کہا کہ فرٹیلائزر کی اکتوبر کی فروخت میں 46 فیصد کمی واقع ہوئی تھی جبکہ ڈسکاؤنٹ کی شرح 16 فیصد تک بڑھ چکی ہے۔

  سابق وزیر خزانہ شوکت ترین نے مزید کہا کہ پرانے پاکستان میں خوش آمدید۔