وزیراعظم شہباز شریف نے کہا ہے کہ دہشت گرد پاکستان کے دشمن اور عوام کے قاتل ہیں، ارض پاک کو اس فتنے سے پاک کرکے رہیں گے۔

تفصیلات کے مطابق وزیراعظم نے اسلام آباد کے سیکٹر آئی 10 فور میں خود کش دھماکے کی مذمت کرتے ہوئے واقعے کی رپورٹ طلب کر لی۔

پوری قوم مل کر دہشت گردی کے خاتمے تک جنگ جاری رکھے گی

وزیراعظم نے اسلام آباد پولیس کے شہید ہیڈ کانسٹیبل عدیل حسین کو خراج عقیدت پیش کرتے ہوئے کہا کہ پولیس اہلکاروں نے اپنے لہو کا نذرانہ دے کر دہشت گردوں کو روکا، قوم اپنے بہادروں کو سلام پیش کرتی ہے۔

انہوں نے کہا کہ پوری قوم مل کر دہشت گردی کے خاتمے تک جنگ جاری رکھے گی، دہشت گرد پاکستان کے دشمن اور عوام کے قاتل ہیں، ارض پاک کو اس فتنے سے پاک کرکے رہیں گے۔

شہباز شریف نے مزید کہا کہ الحمدللہ! قانون نافذ کرنے والے اداروں کی بروقت کارروائی سے بے گناہوں کا خون بہانے کا بڑا اور مذموم منصوبہ ناکام ہوگیا، عوام دہشت گردی کے خاتمے کے لئے اپنی فورسز کے ساتھ بھرپور تعاون کریں۔

وزیراعظم شہباز شریف نے زخمیوں سے ہمدردی کا بھی اظہار کیا اور ان کو بہترین طبی سہولیات فراہم کرنے کی ہدایت دی۔

اس کے علاوہ وزیراعظم نے شہید عدیل حسین کے درجات کی بلندی اور زخمیوں کی جلد صحت یابی کی بھی دعا کی۔

اس موقع پر وزیراعظم نے شہید پولیس اہلکار کو شہداء پیکج دینے اور آئی جی اسلام آباد ڈاکٹر اکبرناصر خان کو غیرمعمولی بہادری کا مظاہرہ کرنے والے اہلکاروں کو انعام اور تعریفی اسناد دینے کی ہدایت دی ہے۔

وفاقی وزیر اطلاعات

دوسری جانب وفاقی وزیر اطلاعات مریم اورنگزیب نےاپنے جاری کردہ بیان میں کہا کہ اسلام آباد بڑی تباہی سے بچ گیا، آئی سی ٹی، پولیس، ایگل اسکواڈ کو سلام، دہشت گردی کی مذمت کرتے ہیں۔

انہوں نے کہا کہ ادائیگی فرض میں شہید عدیل حسین، انکے زخمی ساتھی قوم کے ہیرو ہیں۔ بدامنی سے نجات میں ہی پاکستان کی نجات اور خوش حالی ہے۔

وفاقی وزیر مریم اورنگزیب نے لواحقین کے صبر، شہید کے بلند درجات اور زخمیوں کے لئے صحت کی دعا کی۔

آصف زرداری کی مذمت

علاوہ ازیں سابق صدر آصف علی زرداری نے بھی اسلام آباد میں بم دھماکے کی مذمت کرتے ہوئے کہا کہ پولیس کے بہادر جوانوں نے دہشت گردوں کے ناپاک عزائم کو خاک میں ملا دیا ہے۔

آصف علی زرداری نے دھماکے میں پولیس اہلکار کی شہادت پر افسوس کا اظہار کیا اور انکے خاندان سے ہمدردی اور تعزیت کا بھی اظہار کیا۔

سابق صدر آصف علی زرداری نے زخمی پولیس اہلکاروں کی جلد صحتیابی کیلئے بھی دعا کی۔