وزیر اعظم محمد شہباز شریف نے کہا ہے کہ پاکستانی قوم کو آج قائدِ اعظم کے وضع کردہ اصولوں پر عمل پیرا ہونے کی سب سے زیادہ ضرورت ہے۔

وزیر اعظم نے قائدِ اعظم محمدعلی جناح کے یوم پیدائش کے موقع پر اپنے جاری کردہ پیغام میں کہا کہ بانیِ پاکستان نے برصغیر کے مسلمانوں کے حقوق کی آئینی اور سیاسی جنگ اس احسن طریقے سے لڑی، ان کی بدولت آج ہم سب اس وطنِ عزیز میں آزادی سے سانس لے رہے ہیں۔

شہباز شریف نے کہا کہ قائد اعظم کی جدوجہد برصغیر کے مسلمانوں کو اقوامِ عالم میں ایک نمایاں مقام دلوانے کیلئے تھی۔

وزیر اعظم نے مزید کہا کہ پاکستانی قوم کو آج قائدِ اعظم کے وضع کردہ اصولوں پر عمل پیرا ہونے کی سب سے زیادہ ضرورت ہے۔ مذہبی منافرت اور ہندتوا کی انتہا پسند سوچ کی وجہ سے بھارت اقلیتوں کے تحفظ میں ناکام ہے۔

صدر مملکت کا پیغام

دوسری جانب صدر مملکت عارف علوی نے بھی یوم قائد اعظم پر پیغام دیتے ہوئے کہا کہ آج ہم یہ عہد کرتے ہیں کہ درست  وقت پر درست فیصلے کریں گے، قائداعظم کے فرمودات پر عمل کرتے ہوئے ملک کو مستحکم بنائیں گے۔

انہوں نے کہا کہ آج قائد کے جمہوری اقدار کے وژن کو برقرار رکھنے کا عہد کریں گے۔ کشمیریوں کی سیاسی، اخلاقی اور سفارتی حمایت جاری رکھیں گے۔

صدر مملکت نے مزید کہا کہ قائداعظم نے کہا تھا کشمیر پاکستان کی شہ رگ ہے، قوم اس شہ رگ کو دشمن کے قبضے میں رکھنے کی اجازت نہیں دے سکتی۔

وزیرداخلہ کا پیغام

علاوہ ازیں وزیرداخلہ رانا ثناء اللہ نے بھی قائداعظم کے یوم پیدائش پر اپنے خصوصی پیغام میں کہا کہ پوری قوم کو بانی پاکستان کے جنم دن کی مبارک باد پیش کرتا یے۔

انہوں نے کہا کہ پاکستان، برصغیر کے مسلمانوں پر قائداعظم کا ایک احسان عظیم ہے۔ آج کا دن بانی پاکستان سے عہد کا دن ہے کہ ہم اپنے وطن کی سالمیت اورترقی کیلئے ہرقربانی دینگے۔

رانا ثناء اللہ نے مزید کہا کہ ہم پاکستان کو قائداعظم محمد علی جناح کے فرمودات کی روشنی میں ایک فلاحی اوراسلامی ریاست بنائیں گے۔ یوم قائد پر ہم عہد کریں کہ پاکستان کے ہر شہری کو اسکا آئینی تحفظ اور حقوق ملیں۔

واضح رہے کہ  برصغیر پاک و ہند کے کروڑوں مسلمانوں کو ایک آزاد اور خودمختار اسلامی مملکت کا تحفہ دینے والے قائدِ اعظم محمد علی جناح کا 147 واں یومِ پیدائش آج ملک بھر میں قومی جوش و جذبے سے منایا جارہا ہے۔