پاک افغان بارڈر پر جنگ بندی کے بعد باب دوست دوطرفہ تجارت اور پیدل آمدورفت کے لیے بحال کردیا گیا ہے۔

تفصیلات کے مطابق چمن بارڈر پر افغان فورسز کی جانب سے ماٹرگولے اور فائرنگ کا سلسلہ فی الحال تھم گیا ہے جس کے بعد صورتحال معمول پر آگئی ہے تاہم شہر کی بیشتر دوکانیں بند ہیں اور ٹریفک معمول سے کم ہے۔

یہ بھی پڑھیں: چمن بارڈر: پاکستان اور افغان فورسز کے درمیان فائرنگ، 10 افراد زخمی

اسکے علاوہ کسٹم ٹریڈ کی معمول کی سرگرمیاں بھی جاری ہیں تاہم ماحول میں خوف و ہراس کی فضا ہے جبکہ  ہنگامی صورتحال سے نمٹنے کے لیے سیکیورٹی ہائی الرٹ کردی گئی ہے۔

خیال رہے کہ چمن باڈر سرحد پار سے پاکستانی حدود کے مختلف علاقوں میں فائرنگ و ماٹرگولے فائر کئے گئے تھے جبکہ افغان فورسز کی جانب پاکستان کی حدود میں گلدار باغیچہ، چنگیز پوسٹ سمیت دیگر علاقوں کو نشانہ بنایا گیا تھا۔

یہ بھی پڑھیں: چمن بارڈرفائرنگ، افغان حکومت یقینی بنائے کہ ایسے واقعات کا اعادہ نہ ہو، وزیراعظم

افغان فورسز کی فائرنگ اور گولہ باری سے ایک پاکستانی جاں بحق اور خواتین بچوں سمیت  بیس افراد شدید زخمی ہوگئے جبکہ پاکستان کی جانب سے بھی افغان فورسز کے جواب میں بھر پور کارروائی کی گئی تھی۔

واضح رہے کہ افغان فورسز نے 11 دسمبر کو بھی شہری آبادی پر گولہ باری کی تھی جس میں 8 شہری شہید جبکہ 22 زخمی ہوئے تھے تاہم کل شام کے بعد فائرنگ کا سلسلہ بند ہوا ہے لیکن کشیدگی تاحال برقرار ہے۔

پاکستان کی افغان بارڈر فورسز کی بلا اشتعال فائرنگ کی مذمت

اس حوالے سے ایک پریس ریلیز میں دفتر خارجہ کی ترجمان ممتاز زہرہ بلوچ نے کہا  کہ اس طرح کے افسوس ناک واقعات دونوں ممالک کے درمیان برادرانہ تعلقات کے مطابق نہیں ہیں۔

انہوں نے کہا کہ افغان حکام کو آگاہ کر دیا گیا ہے کہ ایسے واقعات سے گریز کیا جانا چاہیے اور ذمہ داروں کے خلاف سخت کارروائی کی جانی چاہیے۔ سرحد پر شہریوں کی حفاظت کرنا دونوں اطراف کی ذمہ داری ہے۔

انہوں نے کہا کہ دونوں ممالک کے متعلقہ حکام اس بات کو یقینی بنانے کے لیے رابطے میں ہیں کہ صورتحال مزید خراب نہ ہو اور ایسے واقعات کی تکرار سے بچا جا سکے۔

 ممتاز زہرا بلوچ نے مزید کہا کہ واقعہ کے ذمہ داران کے خلاف سخت ترین کارروائی کی جائے، سرحد پر شہریوں کی حفاظت فریقین کی ذمہ داری ہے اس میں کسی قسم کی کوتاہی دونوں ممالک کے لیے مسائل پیدا کر رہی ہے، دونوں ممالک کے متعلقہ حکام رابطے میں ہیں تاکہ صورتحال مزید خراب نہ ہو اور ایسے واقعات کی تکرار سے بچا جا سکے۔