وفاقی دارالحکومت اسلام آباد کے نجی تعلیمی اداروں میں موسم سرما کی تعطیلات میں مزید توسیع کردی گئی ہے۔

تفصیلات کے مطابق اسلام آباد کے نجی تعلیمی اداروں میں سردیوں کی چھٹیاں مزید بڑھا دی گئیں، جس کا وفاقی وزارت تعلیم نے نوٹیفکیشن جاری کردیا۔

نوٹیفکیشن کے مطابق تمام نجی تعلیمی اداروں میں اب تعطیلات 7 جنوری تک ہوں گی، چھٹیوں میں اضافہ شہر کے سرد موسم کے باعث کیا گیا۔

نوٹیفکیشن میں مزید بتایا گیا ہے کہ اسلام آباد کے نجی تعلیمی اداروں میں 9 جنوری کو دوبارہ تعلیمی سرگرمیوں کا آغاز ہوگا۔

لاہور، تعلیمی اداروں کی چھٹیوں میں مزید ایک ہفتے کی توسیع کا تحریری حکم جاری

گزشتہ روز لاہور ہائیکورٹ نے اسموگ کے خلاف کیس میں اسکولوں اور کالجوں میں موسم سرما کی چھٹیوں میں مزید ایک ہفتے کی توسیع کا تحریری حکم جاری کردیا تھا۔

 لاہور ہائیکورٹ کے جسٹس شاہد کریم کی جانب سے اسموگ کے خلاف کیس کا تحریری حکم جاری کردیا گیا ہے جو کہ دو صفحات پر مشتمل تھا۔

تحریری حکم کے مطابق عدالت نے اسموگ سے بچاؤ کے لئے اسکولوں اور کالجوں کی چھٹیوں میں مزید ایک ہفتے کی توسیع کا تحریری حکم دیا ہے۔

یہ بھی پڑھیں: لاہور کی اسموگ میں پھر اضافہ،دنیا کا چوتھا آلودہ ترین شہر قرار

لاہور ہائیکورٹ نے متعلقہ اداروں کو اسکولوں، کالجز اور تمام تعلیمی اداروں میں چھٹیوں میں توسیع کا نوٹیفکیشن جلد جاری کرنے کی ہدایت کی ہے۔

عدالت نے اپنے تحریری حکم میں ایڈیشنل ایڈووکیٹ جنرل کو متعلقہ اداروں کو عدالتی فیصلے سے آگاہ کرنے کا بھی حکم دیا ہے۔

لاہور ہائیکورٹ نے تحریری حکم میں محکمہ ماحولیات کو آلودگی کے خاتمے کے لئے رولز جلد وضع کرنے کی ہدایت کردی۔