پاکستان تحریک انصاف (پی ٹی آئی) سندھ کے صدر علی زیدی نے کہا ہے کہ رات کے اندھیرے میں ایڈمنسٹریٹر لگائے جارہے ہیں۔

 سابق وفاقی وزیر علی زیدی نے کراچی میں پریس کانفرنس کرتے ہوئے کہا کہ ہم بلدیاتی انتخابات کی تیاریاں کررہے ہیں۔

انہوں نے کہا کہ لوگ سیلاب کے باعث سب کچھ کھو چکے ہیں، یہ لاہور جاکر بولیاں لگا رہے ہیں، کل رات15 کروڑ تک کی بولی لگ گئی تھی، انہوں نے ملک کو مامے کی جاگیر سمجھ رکھا ہے، اگر اس طرح ملک چلنا ہے تو ہماری اور آپ کی ضرورت کیا ہے۔

پی ٹی آئی سندھ کے صدر کا کہنا تھا کہ جو مرضی پری پول ریگنگ کرلیں،اس  پر خط لکھا اور عدالت بھی جاؤں گا۔

علی زیدی نے کہا کہ کراچی کے تاجروں کیساتھ کل جو کیا اس کی مذمت کرتا ہوں، سندھ حکومت پولیس کو استعمال کرنے میں ماسٹر ہے۔

ایم کیو ایم کے سرگرم کارکنوں کو عہدے دیے جارہے ہیں

سابق وفاقی وزیر نے کہا کہ ایم کیوایم کے سرگرم کارکنوں کو عہدے دیے جارہے ہیں، محمد شریف مطلوب تھے اب سرگرم ایڈمنسٹریٹر لگا دیا گیا، رات کے اندھیرے میں نوٹیفکیشن نکل رہے ہیں، ایڈمنسٹریٹر کراچی کو ان کی اپنی جماعت متعارف کرانے سے شرما رہی ہے۔

یہ بھی پڑھیں: ملک پر قابض کرپٹ اشرافیہ نے ملک کو مسائل کی دلدل میں دھکیل دیا ہے، علی زیدی

انہوں نے کہا کہ سندھ کے وزیر ٹی وی پر تماشا کرتے ہیں، رات کے اندھیرے میں ایڈمنسٹریٹر لگائے جارہے ہیں، اس پر خط لکھا ہے اور میں عدالت بھی جاؤں گا۔

انکا کہنا ہے کہ 30 مارچ 2018 میں حکومت ن لیگ کی تھی۔ سرگرم ایڈمنسٹریٹر کو اٹھایا گیا تھا، جو پہلے سرگرم کارکن تھے اب سرگرم ایڈمنسٹریٹر ہیں۔

کراچی کے شہریوں کو زندگی کا تحفظ نہیں مل رہا

علی زیدی نے کہا کہ کراچی کے شہریوں کو زندگی کا تحفظ نہیں مل رہا، کراچی اور لاہور میں زمین آسمان کا فرق ہے، پچھلے 2 دنوں میں 2 بوری بند لاشیں ملیں ہیں، ملک میں دہشت گردی واپس آگئی ہے۔

سابق وفاقی وزیر نے مزید کہا کہ عزیر بلوچ اور گلو بٹ ہماری جماعت سے نہیں نکلے،ہم نے اپنی جماعت کے بڑے عہدیداروں کو نکال دیا ہے۔