خیبرپختونخوا کے صوبائی وزیر برائے پارلیمانی امور شوکت یوسفزئی نے کہا ہے کہ تحریک انصاف کے چیئرمین عمران خان کا ہر فیصلہ قبول ہو گا۔

صوبائی وزیر شوکت یوسفزئی نے بول نیوز سے گفتگو کرتے ہوئے کہا کہ عمران خان کا ہر فیصلہ  قبول ہو گا، عمران خان کا فیصلہ قبول کرنے سے کون انکار کرے گا؟

شوکت یوسفزئی نے مزید کہا کہ تحریک انصاف چار حکومتیں صرف عوام کے لیے چھوڑ رہی ہے۔

اس حوالے سے پارٹی ذرائع نے بتایا کہ اس مرتبہ قومی اسمبلی کے ٹکٹ چیئرمین تحریک انصاف عمران خان خود دیں گے، ٹکٹ الیکٹیبلز کی بجائے پارٹی کے اہل امیدواروں کو دیے جائیں گے۔

پارٹی ذرائع کا مزید کہنا تھا کہ صوبائی اسمبلی کے ٹکٹس عمران خان سے مشاورت کر کے پارلیمانی بورڈ دے گا۔

‘کے پی، پنجاب، آزاد کشمیر اور گلگت بلتستان میں حکومت ختم کررہے ہیں’

دو روز قبل بھی صوبائی وزیر شوکت یوسفزئی نے بول نیوز سے گفتگو کرتے ہوئے کہا تھا کہ تحریک انصاف صرف کے پی اور پنجاب سمیت آزاد کشمیر اور گلگت بلتستان میں بھی اپنی حکومت ختم کر رہی ہے۔

شوکت یوسفزئی نے کہا کہ عمران خان صرف عوام کے لیے اپنی حکومتیں چھوڑ رہے ہیں کیونکہ موجودہ حالات میں عام انتخابات ناگزیر ہو گئے ہیں۔

انہوں نے مزید کہا تھا کہ آئندہ انتخابات کے لئے عمران خان جس کو پارٹی ٹکٹ دیں گے ہر ایک قبول کرے گا۔

عمران خان آج بھی مصروف دن گزاریں گے

دوسری جانب پاکستان تحریک انصاف کا اسمبلیوں کی تحلیل کرنے کی حتمی تاریخ کے معاملے پر پاکستان تحریک انصاف کے چیئرمین عمران خان آج بھی زمان پارک میں مصروف دن گزاریں گے۔

پاکستان تحریک انصاف کے چیئرمین عمران خان پنجاب کے مختلف اضلاع کے ارکان قومی و صوبائی اسمبلی ملاقاتیں کریں گے۔

اس کے علاوہ پی ٹی آئی کے چیئرمین عمران خان زمان پارک میں مختلف پارٹی رہنماؤں سے ملاقاتیں کریں گے، استعفوں اور اسمبلیوں کی تحلیل پر رہنماؤں سے مزید مشاورت بھی کریں گے۔

خیال رہے کہ زمان پارک کے اطراف میں سیکیورٹی کے سخت انتظامات کر لئے گئے ہیں، سی سی ٹی وی کیمروں کی مدد سے زمان پارک کے اطراف کی نگرانی کی جارہی ہے۔