وزیر خزانہ اسحاق ڈار کا کہنا ہے کہ حالات مشکل ضرور ہیں لیکن پاکستان ڈیفالٹ نہیں ہوگا۔

وفاقی وزیر اسحاق ڈار نے پاکستان اسٹاک ایکسچینج کی تقریب سے خطاب کرتے ہوئے کہا کہ معیشت کیلئے 3 کام بہت خطرناک ہورہے ہیں، ڈالر اسمگلنگ، گندم امپورٹ اور فرٹیلائزر کی اسمگلنگ بہت خطرناک ہے، ہم نے اسمگلنگ کی روک تھام کیلئے اقدامات کیے ہیں۔

روپے کی بے قدری بہت بڑا مسئلہ ہے

اسحاق ڈار نے کہا کہ روپے کی بے قدری بہت بڑا مسئلہ ہے، لوگ پریشان ہو کر کبھی سونا خریدتے ہیں کبھی ڈالر۔

انہوں نے کہا کہ اسٹیٹ بینک نے اپنی امپورٹ ترجیحات کو تبدیل کیا ہے، کھانے پینے اور جان بچانے والی ادویات کو پہلی ترجیح میں رکھا گیا ہے اور پٹرولیم مصنوعات کی امپورٹ کو دوسری ترجیح میں رکھا گیا ہے۔

پوری دنیا کو مشکل حالات کا سامنا ہے

وزیر خزانہ نے کہا کہ کچھ لوگ اپنی سیاست کے لیے ملک کا نقصان کررہے ہیں، پوری دنیا کو مشکل حالات کا سامنا ہے، ملک کی بہتری کے لیے سب کو مل کر کام کرنا ہوگا۔

انکا کہنا ہے کہ سنگین مسائل ہیں ہم نے پاکستان کو بھنور سے نکالنا ہے، پاکستان کا مستقبل بہت تابناک ہے، ہم نے پاکستان کو وہاں لاکر کھڑا کردیا جہاں نہیں ہونا چاہیے تھا۔

پاکستان کے ڈیفالٹ ہونے کا کوئی امکان نہیں

وفاقی وزیر نے کہا کہ 2014 میں بھی ملک کے ڈیفالٹ کی باتیں ہورہی تھیں، روز سنتے ہیں پاکستان ڈیفالٹ ہوجائے گا، کیسے ہوجائے گا، مشکل حالات ضرور ہیں لیکن پاکستان ڈیفالٹ نہیں ہوگا، پاکستان کے ڈیفالٹ ہونے کا کوئی امکان نہیں، ماضی کی غلطیوں سے سیکھ کر ملک بہتری کی طرف گامزن ہوگا۔

اسحاق ڈار نے کہا کہ رواں مالی سال کے اختتام تک زرمبادلہ ذخائر میں بھی بہتری آئے گی، معاشی بہتری کے لیے کاروباری طبقے کی تجاویز کا خیرمقدم کریں گے۔

ہم ایک ایک بلین ڈالر کے لیے بھاگ رہے ہیں

انہوں نے کہا کہ ہم ایک ایک بلین ڈالر کے لیے بھاگ رہے ہیں، کاروباری طبقہ ملکی ترقی کے لیے حکومت کیساتھ کھڑا ہے، ہمارے دور میں اسٹاک ایکسچینج جنوبی ایشیا کی بڑی مارکیٹ تھی، ذمہ داری سنبھالی تو ایس ای سی پی اور اسٹاک ایکسچینج پر توجہ مرکوز کی، ملکی معیشت میں اسٹاک مارکیٹ کا کلیدی کردار ہے۔

وزیر خزانہ نے مزید کہا کہ ہمیں کارپوریٹ سیکٹر میں توجہ دینے کی ضرورت ہے، پی ٹی آئی دور میں ایس ای سی پی پر کوئی توجہ نہیں دی گئی، ملکی معیشت میں بہتری کےلیے کوشاں ہیں۔