فیاض الحسن چوہان نے کہا ہے کہ عمران خان کے بغیر پاکستان کی سیاست نا مکمل ہے۔

تفصیلات کے مطابق ترجمان وزیراعلیٰ پنجاب فیاض الحسن چوہان نے ٹیکنوکریٹ حکومت کے شوشے پراپنے ایک بیان میں کہا کہ عمران خان اور پی ٹی آئی کی مقبولیت کا جن پی ڈی ایم کو چین سے نہیں سونے دے رہا۔

انہوں نے کہا کہ پی ڈی ایم نے عمران خان کی مقبولیت کے ڈر سے سندھ اور اسلام آباد کے بلدیاتی الیکشنز ملتوی کروائے اور اب یہ لوگ قومی الیکشنز کروانے سے گریزاں ہیں اور فرار چاہتے ہیں۔

فیاض الحسن چوہان نے یہ بھی کہا کہ اب پی ڈی ایم کی جانب سے ٹیکنوکریٹ حکومت کا شوشہ چھوڑا جا رہا ہے جس کی آئین میں گنجائش نہیں،پوری پی ٹی آئی اس شوشے اور اختراع کی پر زور مذمت کرتی ہے جبکہ عمران خان کو ملکی سیاست سے دور رکھنے کے لئے ایسی باتیں کی جا رہی ہیں۔

یہ بھی پڑھیں؛ عمران خان کا بنی گالہ منتقل ہونے کا امکان

ترجمان وزیراعلیٰ پنجاب فیاض الحسن چوہان نے مزید کہا کہ عمران خان کے بغیر پاکستان کی سیاست نا مکمل ہے، الیکشن سے فرار حاصل کرنے  کیلئے چور ٹولہ ٹیکنوکریٹ حکومت کے لئے ماحول بنا رہا ہے۔

علاوہ ازیں چیئرمین پی ٹی آئی عمران خان کی زیر صدارت پارٹی کے سینیٹرز کا اجلاس بھی ہوا۔ جس میں عمران خان نے پارٹی سینیٹرز کو ہدایت دی کہ مجوزہ ٹیکنوکریٹ نظام قابل قبول نہیں، سینیٹ میں حکومت کوٹف ٹائم دیا جائے۔

عمران خان کا کہنا تھا ملک کی معاشی اور سیاسی صورتحال تباہ کن ہے، اس حکومت میں گزرتا ہر لمحہ ملک کو تباہی کی سمت لے جارہا ہے۔ اجلاس میں ڈپٹی چیئرمین سینیٹ نے بھی شرکت کی جب کہ اسمبلیوں کی تحلیل پر بھی تفصیلی گفتگو کی گئی۔