وزیراعظم شہباز شریف نے کہا ہے کہ شہید محترمہ بینظیر بھٹو جمہوری وسیاسی جدوجہد کی روشن علامت ہیں جنہوں نے عوام کے حقوق کی جدوجہد میں جام شہادت نوش کیا۔ 

وزیراعظم نے شہید محترمہ بے نظیر بھٹو کی برسی پر خراج عقیدت پیش کرتے ہوئے کہا کہ 27 دسمبر 2007 کا سیاہ دن عوام کی ایک محبوب راہنما کی شہادت کا ناقابل فراموش دن ہے۔

ملک اور جمہوریت کیلئے بے نظیر کی تاریخی خدمات پر خراج عقیدت پیش کرتے ہیں

انہوں نے کہا کہ اسلامی دنیا کی پہلی خاتون وزیراعظم بے نظیر بھٹو کی تمام عمر جہد مسلسل کی ولولہ انگیز داستان ہے، ملک، عوام اور جمہوریت کے لئے محترمہ بے نظیر بھٹو کی تاریخی خدمات پر خراج عقیدت پیش کرتے ہیں۔

شہباز شریف نے کہا کہ آئین کی سربلندی، آمریت کے خلاف ان کی پرعزم اور نڈر عوامی و سیاسی تحریک تاریخ کا قابل فخر اور سنہرا باب ہے۔ قائد محمد نواز شریف اور محترمہ بے نظیر بھٹو نے ملک اور عوام کو میثاق جمہوریت کا تاریخی تحفہ دیا، ملک کی سیاست میں ایک نئے دور کا آغاز کیا۔

انکا کہنا ہے کہ میثاق جمہوریت ہمارے قائدین کی سیاسی بصیرت کا ایک تاریخی کارنامہ ہے جس سے پاکستان میں ایک نئے سیاسی کلچر اور روایت کا آغاز ہوا۔

بے نظیر کی شہادت دہشتگردی کیخلاف پاکستان کے آہنی عزم کا ثبوت ہے

وزیراعظم نے کہا کہ محترمہ بے نظیر بھٹو نے دہشت گردی کے خلاف جرات مندانہ اور واضح موقف اختیار کیا، ان کی شہادت دہشت گردی کے خلاف پاکستان کے آہنی عزم کا ثبوت ہے۔

انہوں نے کہا کہ محترمہ بے نظیر بھٹو نے ملکی دفاع کی مضبوطی، آئینی اداروں کی تقویت اور سماجی فلاح و بہبود کے لئے انتھک خدمات انجام دیں۔

یہ بھی پڑھیں: شہید بینظیر بھٹو کی 15ویں برسی، ملک بھر سے قافلوں کی آمد کا سلسلہ جاری

شہباز شریف نے مزید کہا کہ سابق صدر زرداری، بلاول بھٹو سمیت اہل خانہ اور شہید بے نظیر بھٹو کے تمام وابستگان سے تعزیت اور ہمدردی کا اظہار کرتے ہیں، اللہ تعالیٰ شہید بے نظیر بھٹو سمیت تمام شہداء کے درجات بلند فرمائے اور اہل خانہ کو صبر جمیل عطا فرمائے۔