وفاقی دارالحکومت اسلام آباد کے علاقے آئی 10 میں ہونے والے مبینہ خودکش دھماکے کی پیش نظر ملک کے مختلف شہروں کی سیکیورٹی ہائی الرٹ کردی گئی ہے۔

کوئٹہ سیکیورٹی:

اسلام آباد دھماکے کے بعد کوئٹہ میں سیکیورٹی ہائی الرٹ کردی گئی ہے جبکہ شہر کے داخلی و خارجی راستوں پر چیکنگ کا عمل سخت کردیا گیاہے۔

اسکے علاوہ مساجد و امام بارگاہوں پر اضافی اہلکار تعینات جبکہ عیسائی برداری کی کالونی اور گرجا گھروں کی سیکیورٹی بھی سخت کردی گئی ہے۔

لاہورسمیت تمام اضلاع میں سیکیورٹی انتظامات سخت:

آئی جی پنجاب کی جانب سے  لاہورسمیت تمام اضلاع میں حساس و عوامی مقامات کے سیکیورٹی انتظامات مزید سخت کرنے کی ہدایت جاری کردی گئی ہے۔

علاوہ ازیں آئی جی پنجاب عامر ذوالفقار خان نے دہشت گردی کے حالیہ واقعہ کے پیش نظر صوبہ بھر میں سیکیورٹی ہائی الرٹ کرنے کا حکم دیتے ہوئے  پنجاب کی تمام اضلاع کے فیلڈ افسران کو سیکیورٹی انتظامات پر خصوصی توجہ دینے کی ہدایت کی ہے۔

یہ بھی پڑھیں: خیبر پختونخوا کی سیکیورٹی نظرانداز

تمام آر پی اوز اور ڈی پی اوز کو اہم تنصیبات، عبادت گاہوں، اسپتالوں اور پارکوں سمیت دیگرحساس مقامات کی سکیورٹی بڑھانے کی ہدایت دی گئی ہے اور کہا ہے کہ تمام اضلاع میں سرچ، سویپ اور کومبنگ آپریشنز میں مزید تیزی لائی جائے۔

آئی جی پنجاب کی ہدایات کے مطابق بین الصوبائی اور بین الاضلائی چیک پوسٹوں پر چیکنگ کا عمل مزید مؤثر بنایا جائے جبکہ  اسپیشل برانچ اور سی ٹی ڈی کو بھی انٹیلی جنس بیسڈ آپریشن تیز کرنے کی ہدایت کی گئی ہے۔