پیپلزپارٹی کے رہنما قمر زمان کائرہ نے کہا ہے کہ ملک میں دہشتگردی کے واقعات پھر سر اٹھا رہے ہیں۔

وزیر اعظم کے مشیر قمر زمان کائرہ نے اسلام آباد میں میڈیا سے گفتگو کرتے ہوئے کہا کہ عمران خان نے دوست ممالک کو ناراض کیا۔ عمران خان کے بلاول بھٹو کیخلاف بیان پر افسوس ہے۔

یہ نفرت اور انتشار کی سیاست کررہے ہیں

انہوں نے کہا کہ وزیر خارجہ نے پاکستان میں بیٹھ کر کام کرنا نہیں ہوتا ہے، وزیر خارجہ نے بیرون ملک خارجہ محاذ سنبھالنا ہوتا ہے۔

قمر زمان کائرہ نے کہا کہ سابق دور میں سفارتی تعلقات متاثر ہورہے تھے، یہ نفرت اور انتشار کی سیاست کررہے ہیں۔

ہمیں اپنے شہداء پر فخر ہے

پیپلزپارٹی کے رہنما کا کہنا ہے کہ کے پی اور بلوچستان میں دہشت گردی پھر سر اٹھارہی ہے، ہمیں اپنے شہداء پر فخر ہے، ان کو سلام پیش کرتے ہیں۔

قمر زمان کائرہ نے مزید کہا کہ دہشت گردی کے خلاف ہم نے بہت قربانیاں دی ہیں، ملک میں دہشتگردی کے واقعات پھر سر اٹھا رہے ہیں۔

دہشتگردی کے واقعات، وزیراعظم کا قومی سلامتی کمیٹی کا اجلاس بلانے کا فیصلہ

دوسری جانب ملک میں دہشت گردی کے بڑھتے واقعات کے معاملے پر وزیراعظم شہباز شریف نے قومی سلامتی کمیٹی کا اجلاس بلانے کا فیصلہ کر لیا ہے۔

ذرائع نے بتایا کہ قومی سلامتی کمیٹی کا اجلاس رواں ہفتے ہی بلائے جانے کا امکان ہے جس میں اعلیٰ سول و عسکری حکام شرکت کرینگے۔

یہ بھی پڑھیں: بلوچستان: بارودی سرنگ دھماکا، کیپٹن سمیت 5 سیکیورٹی اہلکار شہید

ذرائع کے مطابق قومی سلامتی کمیٹی کے اجلاس میں نیشنل ایکشن پلان پر عمل درآمد کی صورتحال کا جائزہ لیا جائے گا۔

ذرائع کا کہنا تھا کہ بلوچستان اور خیبرپختونخوا میں دہشت گردی کی لہر میں اضافے کی وجوہات بھی اجلاس میں زیر بحث آئیں گی اور دہشتگردی سے نمٹنے کے لیے کام کرنے والے اداروں کی کارکردگی اور مسائل کا بھی جائزہ لیا جائے گا۔

ذرائع نے مزید بتایا کہ اجلاس میں کالعدم تحریک طالبان پاکستان سے مذاکرات کی موجودہ صورت حال اور ماضی کے معاہدوں پر عمل درآمد پر بھی بحث ہوگی۔