وزیر اعلیٰ پنجاب چودھری پرویز الٰہی نے کہا ہے کہ 13 جماعتوں کا اتحاد اکیلے کپتان کے سامنے ریت کی دیوار ثابت ہوا ہے۔

تفصیلات کے مطابق وزیر اعلیٰ پنجاب چودھری پرویز الٰہی اور سابق وفاقی وزیر مونس الٰہی سے سابق وفاقی وزیر زرتاج گل نے ملاقات کی جس میں سیاسی صورتحال اور ڈیرہ غازی خان کے ترقیاتی منصوبوں پر گفتگو ہوئی۔

چودھری پرویز الٰہی نے اس موقعے پر کہا کہ ہم چیئرمین پی ٹی آئی عمران خان کے ساتھ ہیں اور ساتھ رہیں گے، غلط فہمیاں پیدا کرنے والے پہلے کی طرح ناکام رہیں گے، ہمارا اتحاد پہلے سے زیادہ مضبوط ہے۔

پرویز الٰہی نے کہا کہ ڈیرہ غازی خان کے ترقیاتی منصوبوں کی بروقت تکمیل یقینی بنائیں گے، ڈویلپمنٹ پراجیکٹس میں عوامی نمائندوں کی مشاورت یقینی بنائی گئی ہے، ترقی ڈیرہ غازی خان کے عوام کا حق ہے اور عوام کو یہ حق ضرور دیں گے۔

ان کا کہنا تھا کہ سردار فتح محمد خان بزدار انسٹی ٹیوٹ آف کارڈیالوجی عوامی فلاح و بہبود کا منصوبہ ہے، کارڈیالوجی انسٹی ٹیوٹ میں ڈاکٹروں کو اسپیشل الاؤنس دینے کی تجویز کا جائزہ لے رہے ہیں، کارڈیالوجی انسٹی ٹیوٹ سے بلوچستان کے عوام بھی مستفید ہو سکیں گے۔

زرتاج گل نے کہا کہ وزیراعلیٰ چودھری پرویز الٰہی عوام کی خدمت اور فلاح کا قابل قدر ویژن رکھتے ہیں، پرویز الٰہی ڈی جی خان کے عوام کے مسائل کو حل کرنے کے لئے مخلص اور متحرک ہیں۔

ملاقات میں ہمایوں خان بھی موجود تھے۔