مشیر داخلہ و اطلاعات حکومت پنجاب عمر سرفراز چیمہ نے کہا ہے کہ شریف فیملی نے معاشرے میں کرپشن اور منی لانڈرنگ کا زہر گھولا ہے،  اور ان کی کرپشن کی غضب کہانیاں زبان زد عام ہیں۔

مشیر داخلہ و اطلاعات حکومت پنجاب عمر سرفراز چیمہ نے سلیمان شہباز کو جواب دیتے ہوئے کہا کہ این آر او 2 سے مستفید ہونے والا سلیمان شہباز بھی بھاشن دے رہا ہے، ان کے والد نے کلین چٹ دلانے کیلئے ڈگی سمیت سب حربے استعمال کیے ہیں۔

انہوں نے کہا کہ اربوں روپے لوٹنے والے کو جیل میں ہونا چاہیے تھا مگر کرپٹ ٹولہ لٹیروں کو پروٹوکول دے رہا ہے اور سرٹیفائیڈ لٹیرے ملک پر قابض ہوگئے ہیں۔

انہوں نے مزید کہا کہ اسحاق ڈار نے برملا اعتراف کیا کہ وہ شریف خاندان کیلئے منی لانڈرنگ کرتا تھا، شریف خاندان ایون فیلڈ، مے فیئرز کے اربوں روپے کے اثاثوں کے ثبوت آج تک جمع نہیں کرواسکا لیکن شریف خاندان 16 ارب کی ٹی ٹیز کے واضح ثبوتوں کے باوجود این آر او 2 سے بچ نکلا  ہے۔

عمر سرفراز چیمہ نے کہا کہ ٹی ٹیز کی تحقیقات کرنے والے ڈاکٹر رضوان سمیت دیگر متعلقہ کرداروں کو ہمیشہ کیلئے خاموش کروادیا گیا اور عمران خان مافیا کو اس لیے کھٹکتا ہے کہ وہ اشرافیہ کی کرپشن کیخلاف واحد دیوار ہے لیکن قوم جاگ چکی ,مافیا کے دن گنے جا چکے ,عوامی طاقت سے امپورٹڈ ٹولے کو بھگا کر دم لیں گے,۔