وفاقی وزیر داخلہ رانا ثناء اللہ نے کہا ہے کہ اسمبلیاں آئینی ادارے ہیں، انکے ساتھ مذاق نہیں ہونا چاہیے لیکن اسمبلیاں کسی کی انا اور ضد میں توڑنے کی بات کی جارہی ہیں ۔

پریس کانفرنس کرتے ہوئے وزیر داخلہ رانا ثناء اللہ نے کہا کہ گورنر نے اپنا آئینی حق استعمال کیا لیکن پرویزالہٰی نے اعتماد کا ووٹ نہیں لیا، ان کو چاہیئے کہ یہ پہلے اعتماد کا ووٹ لیں، پھر اسمبلیاں توڑیں اور میدان میں آئیں۔

ہارس ٹریڈنگ کا خدشہ ہوگا:

انہوں نے کہا کہ 18 دن میں ایک ایک دن پنجاب کے خزانے پر بھاری گزرے گا، اس دوران کرپشن کا بازار گرم ہو گا، ہارس ٹریڈنگ کا خدشہ ہوگا جس کے لئے ہمارا مطالبہ ہے کہ عدالت عظمیٰ کو نوٹس لینا چاہیے، سپریم کورٹ سو موٹو نوٹس لے کر پنجاب کو کرپشن سے بچائیں۔

انہوں نے مزید کہا کہ حکم امتناعی پر ان کو مکمل اختیار دینا ظلم کے مترادف ہے اور جب عدالت نے کہا کہ اعتماد کا ووٹ لے لیں تو اگر بندے پورے ہیں تو اعتماد کا ووٹ لے لیں۔

وزیر داخلہ کا کہنا تھا کہ یہ ملک دشمن ایجنڈے پر گامزن ہیں لیکن پی ڈی ایم نے ملک کے مفاد میں بڑا فیصلہ کیا، ہم نے ملک کو سنبھالا اور ملک کو ڈیفالٹ ہونے سے بچایا ہے۔

یہ بھی پڑھیں: اگر مگر چھوڑیں اسمبلی توڑیں، رانا ثناء اللہ کا عمران خان کو چیلنج

ہمیں الیکشن کا کوئی خوف نہیں:

وزیر داخلہ نے کہا کہ ہمیں الیکشن کا کوئی خوف نہیں، وہ اپنے وقت پر ہوگا اور ہم نے پنجاب میں الیکشن کی تحریک شروع کر دی ہے۔

اسمبلیاں بچوں کا کھیل نہیں، جب چاہے بنا دیا اور چاہا تو توڑ دیا

اس موقع پر پریس کانفرنس کرتے ہوئے وفاقی وزیر ریلوے خواجہ سعد رفیق نے کہا ہے کہ گزشتہ روزکے لاہور ہائیکورٹ کے فیصلے میں قانونی خلا موجود ہے جس میں پرویزالہٰی کو عدالت نے سویٹ آپشن دیا کہ اگر چاہے توووٹ لیں لیکن اسمبلیاں بچوں کا کھیل نہیں ہیں کہ جب چاہے بنا دیا اور چاہا تو توڑ دیا۔

انہوں نے کہا کہ ہم پنجاب حکومت کواسٹےآرڈر کے پیچھے چھپنے نہیں دیں گے اور امکان ہے کہ فیصلے کو ہم قانونی فورم پر چیلنج کریں گے۔

انہوں نے بتایا کہ عمران خان چاہتے ہیں کہ اسٹیبلشمینٹ سیاست میں ملوث ہو، جس کے لئے انہوں نے اسٹیبلشمینٹ کو سیاسی مداخلت کےلیے دعوت دی جبکہ ادارے کہہ چکے ہیں کہ وہ سیاست میں مداخلت نہیں کریں گے۔