ایم کیو ایم رہنما وسیم اختر نے کہا ہے کہ ہم نے ہمیشہ مسائل کو حل کرنے کی کوشش کی ہے۔

تفصیلات کے مطابق متحدہ قومی موومنٹ (ایم کیو ایم) کے رہنما وسیم اختر نے اپنے ایک بیان میں کہا کہ جس طرح ایم کیو ایم کو نقصان پہنچانے کی کوشش کی جارہی ہیں اور 22 اگست کے بعد جس طرح ایم کیو ایم جدوجہد کر رہی ہے اس کی بھی بات ہونی چاہیئے۔

انہوں نے کہا کہ جس وقت ایم کیو ایم پاکستان نے مجھے میئر کراچی بنایا تھا اس وقت بھی مشکلات تھی، ہم نے کوشش کی کہ مسائل حل ہوں جبکہ سازشوں کا بھی سامنا کیا۔

    ان کا کہنا تھا کہ جو کام کرنے نکلے گا اس سے غلطیاں بھی ہوں گی جبکہ غلطیاں ضرور ہوئی ہیں مگر آج وہ زمہ داریاں ہمارے کاندھوں پر ہیں۔

وسیم اختر نے کہا کہ ہم پارٹی مضبوط کرنا چاہتے ہیں جبکہ حلقہ بندیاں اور نوکریوں کے مسائل حل کے لیئے پیپلز پارٹی کے ساتھ بیٹھ کر بات کرنی پڑ رہی ہے۔

انہوں نے کہا کہ ہمیں سارے اختلاف بھول کر اس الیکشن میں جانا ہے اور ہمیں بھرپور طریقہ سے جیتنا ہے۔

ان کا کہنا تھا کہ سازشی ٹولہ نہیں چاہتا کہ ایم کیو ایم مضبوط ہو۔

متحدہ قومی موومنٹ (ایم کیو ایم) کے رہنما وسیم اختر نے مزید کہا کہ مشکل چیزیں آپ کو نظر آرہی ہوگی لیکن آپکو ہمارا ساتھ دینا ہوگا جبکہ ہمیں بلدیاتی الیکشن میں حق پرست میئر چاہیئے۔