سول ایوی ایشن حکام کا کہنا ہے کہ کوئی بھی بندہ نہ نوکری سے نکالا گیا ہے اور نہ ہی معطل کیا گیا ہے۔

تفصیلات کے مطابق قادر مندوخیل کی صدارت میں متاثرہ ملازمین کی حوالے سے خصوصی کمیٹی کا اجلاس ہوا جس میں سول ایویشن اتھارٹی سے نکالے گئے ملازمین کا معاملہ زیر غور کیا گیا۔

   چیئرمین کمیٹی نے کہا کہ ایوی ایشن سے نکالے گئے ملازمین کی بحالی کے حوالے سے رپورٹ دی جائے۔

 سول ایوی ایشن حکام کا کہنا تھا کہ رپورٹ دستیاب نہیں کمیٹی کے احکامات ضرور ملے ہیں، کچھ لوگوں کے کیسز سپریم کورٹ میں چلے گئے ہیں جبکہ کوئی بھی بندہ نہ نوکری سے نکالا گیا ہے اور نہ ہی معطل کیا گیا۔

یہ بھی پڑھیں؛ سول ایوی ایشن اتھارٹی کے حکام کی ایک اور نا اہلی سامنے آگئی

چیئرمین کمیٹی نے کہا کہ سول ایوی ایشن کے سب سے زیادہ 26 سوافراد ہیں جو نکالے گئے ہیں۔

سول ایوی ایشن حکام کا کہنا تھا کہ سروس لیول ایگریمنٹ تھے جیسے جیسے کنٹریکٹ ختم ہوگا لوگ نکلیں گے۔

 چیئرمین کمیٹی نے کہا کہ پورے پاکستان میں لوگ رل رہے ہیں ہم برداشت نہیں کریں گے، کمیٹی کی واضح ڈائریکشن ہیں اس پر عملدرآمد ہونا چاہیئے۔

یہ بھی پڑھیں؛ سی اے اے حکام نے پی آئی اے کی یورپی ملکوں میں پروازوں کی بحالی کے لیے اقدامات تیز کر دیے

چیئرمین کمیٹی نے مزید کہا کہ چوبیس گھنٹے کے اندر ملازمین کے حوالے سے رپورٹ کمیٹی میں جمع کروائی جائے۔

اس موقع پر خصوصی کمیٹی نے ڈی جی سول ایوی ایشن کو شو کاز نوٹس جاری کرنے اور کمیٹی کی جانب سے سی ای او اور ڈی جی دونوں کو شو کاز جاری کرنے کی ہدایت کی۔

اس موقع پر قادر مندو خیل نے کہا کہ چاہے اسمبلی رکنیت چلی جائے، ملازمین کے ساتھ زیادتی برداشت نہیں ہو گی اور ملازمین کی بحالی میں حیلے بہانے کرنیوالے افسران سے کوئی رعایت نہیں ہوگی۔