وفاقی وزیر منصوبہ بندی احسن اقبال نے کہا ہے کہ  پاکستان کی ترقی کا سفر بحال کرنے کی دوبارہ جدوجہد کررہے ہیں۔

احسن اقبال نے اسلام آباد میں پاکستان انٹرنیشنل فوڈ، نیوٹریشن، ہیلتھ کئیر سمٹ سے خطاب کرتے ہوئے کہا کہ کامیاب نظام میں علم کو استعمال اور فائدہ اٹھانے کی صلاحیت ہوتی ہے، عالمی سطح پر مقابلہ معیشت کی بنیاد پر  ہو رہا ہے۔

انہوں نے کہا کہ پاکستان کے مستقبل کو محفوظ کرنے کے لئے نہایت تیزی سے معاشی میدان میں ترقی کرنی ہے، پاکستان میں بہترین اذہان کے وسائل موجود ہیں۔

نوجوان اس ملک کا مستقبل ہیں

وفاقی وزیر نے کہا کہ امن ،استحکام اور پالیسیوں کا تسلسل ہی ملک کے ترقی کے ضامن ہیں، ہم نے مستقبل کی نسل کو پائیدار ترقی کی بنیاد دینی ہے۔

احسن اقبال نے کہا کہ نوجوان اس ملک کا مستقبل ہیں، معاشرے میں ترقی  کے لئے ہم آہنگی اور تعاون لازمی ہے، نوجوانوں کو منافرت اور عدم برداشت کے عوامل اور عناصر سے بچانا ہوگا، پاکستان کی تعمیر نو کے لئے پاکستان بناؤ تحریک کا حصہ بننا ہو گا۔

پاکستان ہر طرح کے قدرتی وسائل سے مالامال ہے

انکا کہنا ہے کہ برآمدات کو فروغ دینا اولین ترجیح ہے، فارما کی صنعت میں برآمدات میں اضافہ کی بے پناہ صلاحیت ہے، پاکستان ہر طرح کے قدرتی وسائل سے مالامال ہے، ہمارے سائنسدان ان وسائل کے استعمال میں جدت لا کر اپنا کردار بخوبی ادا کریں، وزیر اعظم کا وژن ہے کہ نجی شعبے کے راستے سے رکاوٹیں ہٹائی جائیں۔

پی ٹی آئی حکومت سب کچھ تباہ کر کے گئی

انہوں نے کہا کہ حلال فوڈ کے حوالے سے مشرق وسطی میں برآمدات کے بے پناہ مواقع موجود ہیں، ہم نے اپنے پچھلے دور میں 11000 میگا واٹ بجلی کے منصوبے لگائے، پی ٹی آئی حکومت ترقیاتی بجٹ میں 50 فیصد کمی کر گئی۔

یہ بھی پرھیں: نجی شعبے نے سست معاشی سرگرمیوں کے دوران 185 ارب روپے کے قرض واپس کردیے

احسن اقبال نے کہا کہ سی پیک کا منصوبہ پاکستان کے لئے گیم چینجر تھا، سی پیک کو بھی پچھلی حکومت تباہ کر گئی، وژن 2025 تشکیل دیا تھا تاکہ پاکستان کو ٹاپ 25 اقتصادی مضبوط ممالک کی فہرست میں شامل کر سکیں۔

وفاقی وزیر نے مزید کہا کہ پی ٹی آئی حکومت کو نہ کچھ آتا تھا، جو جاری تھا اسے بھی تباہ کر گئی، اب دوبارہ پاکستان کی ترقی کا سفر بحال کرنے کی جدوجہد کر رہے ہیں۔