وزیراعلیٰ بلوچستان نے کہا ہےکہ اتحادیوں کے ساتھ مل کر صوبے کے دیرینہ مسائل کا حل یقینی بنا رہے ہیں۔

تفصیلات کے مطابق وزیراعلیٰ بلوچستان میر عبدالقدوس بزنجو نے 10 ویں نیشنل ورکشاپ بلوچستان کے شرکاء سے خطاب کرتے ہوئے کہا کہ بیجا تنقید کی کبھی پرواہ نہیں کی، صحت مندانہ اور مثبت تنقید کا ہمیشہ خیر مقدم کیا ہے۔

انہوں نے کہا کہ ایک سال کی مدت میں ترقی کے بہت سے اہداف حاصل کئے اور ابھی بہت کچھ کرنا باقی بھی ہے، تنقید کرنے والے تنقید کرتے رہیں ہم بلوچستان کی ترقی اور عوام کی خدمت کے اپنے مشن کو آگے بڑھاتے رہیں گے۔

وزیراعلیٰ بلوچستان کا کہنا تھا کہ اتحادیوں کے ساتھ مل کر صوبے کے دیرینہ مسائل کا حل یقینی بنا رہے ہیں، اللہ تعالی نے بلوچستان کے عوام کی خدمت کا جو موقع دیا ہے اس سے بھرپور فائدہ اٹھائیں گے۔

میر عبدالقدوس بزنجو کا یہ بھی کہنا تھا کہ ریکو ڈک سمیت تمام اہم صوبائی امور پر خو ش نیتی وجرات کے ساتھ سب کو اعتماد میں لیکر فیصلے کئے، بروقت فیصلے نہ لینا عوام ملک اور صوبے کے لئے ہمیشہ نقصان دہ ثابت ہوتا ہے۔

وزیراعلیٰ بلوچستان میر عبدالقدوس بزنجو نے مزید کہا کہ ہر فیصلے پر میرا ضمیر مطمئین ہے، میں اپنے ہر قول و فعل پر عوام اپنے ضمیر اور سب سے بڑھ کر اللہ تعالئ کے سامنے خود کو جوابدہ سمجھتا ہوں۔

ورکشاپ میں بلوچستان اور ملک کے دیگر صوبوں کے مختلف شعبوں سے تعلق رکھنے والے افراد شامل تھے۔