اسپیکر قومی اسمبلی راجہ پرویز اشرف نے کہا ہے کہ آئین اور قومی اسمبلی قواعد کے مطابق استعفے منظور کریں گے ۔

اسپیکر راجہ پرویز اشرف نے اسلام آباد میں پی ٹی آئی وفد سے ملاقات کے بعد میڈیا سے گفتگو کرتے ہوئے کہا کہ آج پی ٹی آئی کے ایک وفد سے بہت اچھے ماحول میں بات چیت ہوئی، انہوں نے اپنا موقف میرے سامنے رکھا ۔

انہوں نے کہا کہ پی ٹی آئی نے کہا 127 ارکان کے استعفے منظور کیے جائیں، میں نے کہا کہ کچھ قواعد و ضوابط اور حدود ہیں، آرٹیکل 64 میں لکھا ہے استعفی ہاتھ سے لکھا ہو ۔

بطور اسپیکر آئین اور اسمبلی قواعد وضوابط کو دیکھنا ہے

راجہ پرویز اشرف نے کہا کہ قواعد کے مطابق اسپیکر استعفیٰ کی تصدیق رکن کو ذاتی حیثیت میں بلا کر کرے گا، اسپیکر کی ذمہ داری ہے کہ یہ دیکھے کہیں رکن پر دباؤ تو نہیں تھا ۔

انکا کہنا ہے کہ بطور اسپیکر آئین اور اسمبلی قواعد وضوابط کو دیکھنا ہے، ان کو کہا ہے اسمبلی میں جائیں وہاں آپکی آواز مؤثر ہوگی۔

استعفیٰ منظور کرنا معمولی بات نہیں

اسپیکر قومی اسمبلی نے کہا کہ استعفیٰ منظور کرنا معمولی بات نہیں علاقے کے لوگوں کی نمائندگی ہے ، جن کے استعفے منظور کیے وہ آئین اور قواعد و ضوا بط کے مطابق تھے۔

انہوں نے کہا کہ پی ٹی آئی کا خیال تھا کہ 127 لوگوں کے استعفے منظور ہونے چاہئیں، آئین اور قومی اسمبلی قواعد کے مطابق استعفے منظور کریں گے ۔

آئین میں لکھا ہے استعفیٰ اپنے ہاتھ سے لکھا ہونا چاہیے

پرویز اشرف نے کہا کہ پہلا آئینی مطالبہ ہے استعفیٰ ہاتھ سے لکھا ہونا چاہیے، پہلے بھی پی ٹی آئی ممبران کو استعفوں کی تصدیق کے لیے مدعو کیا تھا ۔

یہ بھی پڑھیں: استعفوں کی تصدیق، پی ٹی آئی وفد اور اسپیکر قومی اسمبلی کی ملاقات کا وقت طے

انکا کہنا ہے کہ آئین میں ہے جب اسپیکر بلائے گا تو اس سے تصدیق کرے گا، کچھ ممبران جنہوں نے استعفے دیے وہ عدالت چلے گئے ، عدالت میں ممبران نے کہا دباؤ میں آکر استعفیٰ دیا تھا، آئین میں لکھا ہے استعفیٰ اپنے ہاتھ سے لکھا ہونا چاہیے ۔

اسپیکر قومی اسمبلی نے مزید کہا کہ اس وقت ملک کو مفاہمت اور اتحاد کی ضرورت ہے، سیاست میں دروازے بند نہیں کیے جاتے رابطے ہونے چاہئیں ۔