عمران خان پر قاتلانہ حملے کے معاملے پر تشکیل دی جانے والی جے آئی ٹی نے پاکستان تحریک انصاف (پی ٹی آئی) کی خاتون صوبائی وزیر سمیت 3 رہنماؤں کے بیان ریکارڈ کر لئے ہیں۔

ذرائع جے آئی ٹی کے مطابق صوبائی وزیر ڈاکٹر یاسمین راشد، زبیر خان نیازی اور عمر فاروق نے اپنا بیان ریکارڈ کرایا۔

جے آئی ٹی کے ذرائع نے بتایا کہ تینوں رہنماؤں کا بیان گزشتہ روز جے آئی ٹی نے ریکارڈ کیا جبکہ تینوں رہمناﺅں سے مختلف سوالات بھی کیے گئے۔

ذرائع کا مزید کہنا تھا کہ دیگر رہنماﺅں کو بلوانے کے لیے جے آئی ٹی دوبارہ خط لکھے گی اور کیس کی تفتیش کو جلد از جلد مکمل کرکے رپورٹ حکومت کو بھجوائی جائے گی۔

خیال رہے کہ جے آئی ٹی نے حماد اظہر، فیصل جاوید، عمران اسماعیل، عمر سرفراز چیمہ، فیصل جاوید سمیت 35 افراد کو طلب کر رکھا ہے۔

جے آئی ٹی کا فیصل واوڈا کو شامل تفتیش کرنے کا فیصلہ

اس سے قبل سابق وزیراعظم اور پاکستان تحریک انصاف کے چیئرمین عمران خان پر قاتلانہ حملے کی تفتیش میں اہم پیش رفت سامنے آئی تھی۔

عمران خان پر قاتلانہ حملے کے معاملے پر تشکیل دی جانے والی جے آئی ٹی نے فیصل واوڈا کو شامل تفتیش کرنے کا فیصلہ کیا تھا۔

پنجاب حکومت نے فیصل واوڈا کو شامل تفتیش کرتے ہوئے پیش ہونے کی ہدایت کی تھی جبکہ جے آئی ٹی نے بھی فیصل واوڈا کو ریکارڈ سمیت پیش ہونے کی ہدایت کی تھی۔

جوائنٹ انویسٹیگیشن ٹیم نے سانحہ وزیر آباد سے متعلق تفتیش میں فیصل واوڈا کو طلب کیا تھا کیونکہ انہوں نے آزادی مارچ میں خون خرابہ ہونے سے متعلق بیان دیا تھا تاہم فیصل واوڈا کو تمام دستاویزات، قومی شناختی کارڈ کے ساتھ پیش ہونے کی ہدایت کردی تھی۔

خیال رہے کہ چیئرمین عمران خان پر قاتلانہ حملے کی تحقیقات کے معاملے پر فیصل واوڈا اسپیشل مشترکہ تحقیقاتی ٹیم (جے آئی ٹی) کے سامنے پیش نہیں ہوئے تھے۔

واضح رہے کہ 3 نومبر کو پی ٹی آئی لانگ مارچ کے دوران وزیر آباد میں عمران خان پر قاتلانہ حملہ کیا گیا تھا، جس میں پی ٹی آئی چیئرمین زخمی ہوئے تھے۔

واقعے میں ایک شخص جاں بحق اور پی ٹی آئی چیئرمین و دیگر رہنماؤں سمیت 13 افراد زخمی ہوئے تھے۔

فائرنگ کرنے والے شخص کو بعد میں کنٹینر کے قریب سے پکڑ لیا گیا تھا جس نے عمران خان پر فائرنگ کا اعتراف بھی کیا۔