رانا ثناءاللہ نے کہا ہے کہ بھارت کے دہشت گردی کے مکروہ چہرے کوبے نقاب کریں گے۔

تفصیلات کے مطابق اسلام آباد میں ایڈیشنل آئی جی سی ٹی ڈی پنجاب عمران محمود کے ساتھ پریس کانفرنس کرتے ہوئے وفاقی وزیر داخلہ راناثناءاللہ کا کہنا تھا کہ دہشت گردی کے ہر واقعے کے پیچھے بھارت کا ہاتھ نظر آتا ہے، کلبھوشن یادیوایک منہ بولتا ثبوت ہے۔

ان کا کہنا تھا کہ ملک کی اندرونی سکیورٹی کے حوالے سے بریف کرنا چاہتے ہیں، طالبان کا وہ سگمنٹ جو پاکستان میں دہشت گردی میں ملوث ہے،انہیں بھارت کی سپورٹ ہے۔

راناثناءاللہ نے کہا کہ دہشت گردی کے خلاف مسلح افواج، پولیس، رینجرز، عام شہریوں نے قربانیاں دیں، پاکستان کی امام بارگاہوں، مساجد کونشانہ بنایا گیا۔

وفاقی وزیر داخلہ نے یہ بھی کہا کہ پاکستان کئی سال سے دہشت گردی کی آگ میں جھلس رہا ہے، پاکستان کا ہر طبقہ دہشت گردی سے متاثر ہوا۔

ان کا کہنا تھا کہ حافظ سعید کی رہائش گاہ کے قریب واقعہ ہوا،پولیس کی موجودگی کی وجہ سےگاڑی وہاں تک نہ پہنچ سکی، جب دھماکہ ہوا تب حافظ سعید رہائش گاہ میں موجود نہیں تھے، یہ بھارت کےملوث ہونےکا واضح ثبوت ہے۔

راناثناءاللہ کا کہنا تھا کہ بھارت نے کشمیر میں اس صدی کا بدترین ظلم کیا، اپنے ظلم کو چھپانےکیلئے بھارت ہر قسم کی دہشت گردی کرتا ہے۔

وفاقی وزیر داخلہ راناثناءاللہ کا مزید کہنا تھا کہ بھارت کے دہشت گردی کے مکروہ چہرے کوبے نقاب کریں گے، اقوام متحدہ وزرائے خارجہ اجلاس میں بلاول بھٹو معاملے کواٹھائیں گے۔