وزیراعلیٰ کے پی کے محمود خان نے کہا ہے کہ موجودہ حکومت نے ہمارے بہت سے منصوبے ختم کیے ہیں۔

تفصیلات کے مطابق وزیراعلیٰ کے پی کے محمود خان نے کے پی سٹیز امپرومنٹ پراجیکٹ کی تقریب سے خطاب کرتے ہوئے کہا کہ ہم چار سال محنت کر کے یہ پراجیکٹ گراؤنڈ پر لانے میں کامیاب ہوئے ہیں جبکہ یہ یہ شہر صوبے کی ریڑھ کی ہڈی کی حیثیت رکھتا ہے۔

انہوں نے کہا کہ عمران خان نے جو وعدے کئے تھے انہیں پورا کرنے کے لئے منصوبہ بندی کی، صوبے کی ترقی کے لیے موٹرویز اور اکنامک زونز کی منصوبہ بندی کی۔

ان کا کہنا تھا کہ 11 میں سے 9 ن اکنامک زونز کا افتتاح کرچکے ہیں، لاکھوں افراد کو روزگار فراہم ہوئی ہے جبکہ ہم موٹرویز کے ذریعے پورے صوبے کو جوڑ رہے ہیں۔

 محمود خان نے کہا کہ غذائی قلت پر قابو پانے کے لئے چشمہ رائٹ بینک کینال پر کام شروع کیا ہے جبکہ موجودہ حکومت نے پی ایس ڈی پی سے ہمارے بہت سے منصوبے ختم کئے ہیں۔

انہوں نے کہا کہ وفاقی حکومت نے قبائلی اضلاع کے فنڈز بھی روک لئے ہیں جبکہ وفاقی حکومت کے زمہ 189 ارب روپے واجب الادا بھی ہیں۔

ان کا کہنا تھا کہ 130 ارب روپے کی لاگت سے صوبے کے ڈویزنل ہیڈکوارٹرز میں کے پی سی آئی پی پراجیکٹ شروع ہوچکا ہے۔

ان کا یہ بھی کہنا تھا کہ عوام کے نام پر قرضے لے کر انگلینڈ میں محل اور جزیرے نہیں خریدیں گے۔

وزیراعلیٰ کے پی کے محمود خان نے مزید کہا کہ ہم کمزور نہیں اگر وفاق ہمارا حق نہیں دیگا تو چھین کر لیں گے اور صوبے کے حقوق کے لیے اسلام آباد جا کر دھرنا بھی دیں گے۔