وفاقی وزیر ریلوے سعد رفیق نے کہا ہے کہ عمران خان کو واپس سیاسی جماعتوں کے پاس ہی آنا ہے۔

خواجہ سعد رفیق نے لاہور میں سیمینار سے خطاب کرتے ہوئے کہا کہ ہم صرف کاغذوں میں آزاد ہوئے ہیں، ہمیں آئین اور قانون کی بات کرنی چاہیے۔

انہوں نے کہا کہ ہم اپنی ہر ناکامی کا الزام اسٹیبلشمنٹ پر نہیں لگا سکتے،  سیاسی جماعتیں کیوں خود اپنے پاؤں پر کھڑی نہیں ہونا چاہتیں۔

میری شکایت ملکی سیاسی جماعتوں اور قیادت سے ہے

وفاقی وزیر نے کہا کہ میں آج بطور وزیر بات نہیں کر رہا، پاکستان کو 75 سالوں سے ایسا کیا گیا کہ ملک سنبھالے نہیں سنبھل رہا، آج ہم نے ایک دوسرے کو گرانے کے چکر میں عوام کو بھوکا مار دیا ہے۔

سعد رفیق نے کہا کہ ملک چلنے لگتا ہے تو اسے پھر گرا دیا جاتا ہے جس کے لئے 4 بار علانیہ اور باقی بار غیرعلانیہ کوشش کی گئی، 75 سال گزرنے کے باوجود ملک مکمل آزاد نہیں ہو سکا۔

انکا کہنا ہے کہ میری شکایت ملکی سیاسی جماعتوں اور قیادت سے ہے، ملکی سیاسی جماعتیں کیوں منظم نہیں ہوتیں؟ جدوجہد کا وقت آتا ہے تو صرف چند سو لوگ ہی سامنے آتے ہیں حالانکہ ہم ووٹ کروڑوں لیتے ہیں۔

انہوں نے کہا کہ اس ملک سے کھلواڑ کرنے والے کسی بھی صورت بچ نہیں سکتے، سیاستدان کیوں اپنا کندھا پیش کرتے ہیں، نظریہ ضرورت والے ججوں کے فیصلوں سے ملک کو اربوں ڈالر کا نقصان ہو جاتا ہے۔

سمجھ نہیں آتا کہ عمران خان کو اب کس بات کا ڈر ہے

سعد رفیق نے کہا کہ اندازہ ہے کہ آج ملک کہاں کھڑا ہے، عمران خان ملک کو دیوالیہ پن کے کنارے پر کھڑا کر گیا ہے، اسے لانے والوں سے بھی پوچھا جانا چاہیے نیا پاکستان بنانے والے کون ہوتے ہیں۔

وفاقی وزیر نے کہا کہ سیاسی جماعتیں رحم کریں، جماعتوں میں الیکشن کروائیں، عدم اعتماد کی تحریک کو اون کرتے ہیں، تدار میں رہنے کی دلچسپی ختم ہوگئی ہے، سمجھ نہیں آتا کہ عمران خان کو اب کس بات کا ڈر ہے۔

نواز شریف کو سازش کے تحت جیل میں ڈالا گیا

انکا کہنا ہے کہ نواز شریف کو سازش کے تحت جیل میں ڈالا گیا، ملک کو ترقی کی طرف لے جانا کیا نوازشریف کا قصور تھا؟ جنرل(ر) باجوہ اکیلا ان حالات کا ذمہ دار نہیں تھا، عمران خان ان صورتحال کے بنیفشری تھے۔

سعد رفیق نے مزید کہا کہ سیاسی جماعتوں کو میثاق جمہوریت کو بنیاد بنا کر میثاق معیشت پر بات کرنا ہو گی، اسمبلیاں توڑنے اور استعفوں کی سیاست ختم ہو گی تو ملک میں پانچواں مارشل لاء نہیں لگے گا۔