وفاقی وزیر برائے آئی ٹی سید امین الحق کا کہنا تھا کہ مصنوعی ذہانت، بگ ڈیٹا، کلاؤڈ کمپیوٹنگ، موبائل روبوٹکس وقت کی اہم ضرورت بن چکی ہیں اور  وزارت آئی ٹی بہتر ڈیجیٹل مستقبل کے لئے ہر ممکن اقدامات کررہی ہے۔

تفصیلات کے مطابق وفاقی وزیر آئی ٹی سید امین الحق کا ‘پاکستان-آئی ٹی یو ڈیجیٹل انکلیوژن ویک’ کی افتتاحی تقریب سے خطاب  کرتے ہوئے کہا کہ حکومت پاکستان انٹرنیشنل ٹیلی کمیونیکیشن یونین کی پاکستان کے لیئے خواتین کو بااختیار بنانے، بچوں کی آن لائن پروٹیکشن اور آئی سی ٹی تک رسائی کے حوالے سے سپورٹ پر شکرگزار ہے۔

انہوں نے کہا خواتین کو بااختیار بنانا حکومت پاکستان کی اولین ترجیح ہے تاہم نوجوانوں اور بچوں کو ڈیجیٹل مہارتیں سکھانے کے لیئے بھرپور اقدامات کررہے ہیں۔

انہوں نے بتایا کہ وزارت آئی ٹی کا ‘آئی سی ٹی فار گرلز پراجیکٹ’ خواتین کو بااختیار بنانے میں اہم اقدام ہے اور ملک بھر میں ڈیجیٹلائزیشن کے لئے موثر اقدامات بھی کر رہے ہیں جس کے تحت شہری اور دیہی علاقوں کے مابین ڈیجیٹل تقسیم کے خاتمہ کے لیئے پر عزم ہیں، پسماندہ اور دوردراز علاقوں میں کینکٹوٹی کے مختلف منصوبوں پر کام جاری ہے۔

انہوں نے کہا کہ وزارت آئی ٹی کے تحت معذور افراد کی آئی ٹی تک رسائی کو آسان بنانے کے لیئے نیشنل آئی سی ٹی کونسل کا قیام برائے معذور افراد بڑا حوصلہ افزاء اقدام ہے کیونکہ معذور افراد کو بھی ترقی کے یکساں مواقع فراہم ہونے چاہیے اور آئی ٹی کے استعمال سے معذور افراد کی زندگی میں بہتری لائی جا سکتی ہے۔

انہوں نے مزید کہا کہ ملتان کراچی یا دیگر بڑے شہروں میں کنیکٹوٹی کے کوئی مسائل نہیں ہیں لیکن ہم نے بچوں کو آن لائن ہراسمنٹ سے بچانا ہے  اور پاکستان پہلا ملک ہے جس نے بچوں کو آن لائن ہراست سے بچانے کا پروگرام متعارف کروایا ہے ۔

وفاقی وزیر کا کہنا تھا کہ  ہم نوجوان لڑکیوں کی بااختیار بنانا چاہتے ہیں اور اس حوالے سے جی ایس ایم اے کے ساتھ ملکر ہم نے سمارٹ فون فار آل شروع کیا ہے کیونکہ اگر ہم نے ترقی کرنی ہے تو 22 کروڑ افراد کے ہاتھ میں سمارٹ فون ہونے چاہیے ۔

ان کا کہنا تھا کہ وزارت سنبھالنے کے بعد موبائل فون مینو فیکچرنگ پالیسی بنائی  جس کے تحت آج 29 کمپنیاں پاکستان میں موبائل بنا رہی ہیں اور 7 انکیوبیشن سینٹر کام کررہے ہیں اور چھوٹے شہروں میں 26 سافٹویئر ٹیکنالوجی پارکس بنائے گئے ہیں ۔

انہوں نے بتایا کہ آئی ٹی ایکسپورٹ 2019 میں 1.4 ارب ڈالرز تھیں اور آج آئی ٹی ایکسپورٹس 2.6 ارب ڈالرز تک پہنچ گئ ہے اور اگلے سال تک آئی ٹی برآمدات دگنی کرنے کا ٹارگٹ ہے تاہم ہم آئی ٹی برآمدات بڑھانے کیلئے ایف بی آر اور اسٹیٹ بینک کے ساتھ جنگ لڑرہے ہیں کیونکہ یہاں مائینڈ سیٹ آٹا، دال، چاول بیچنے والا ہے ۔