وزیراعلیٰ سندھ مراد علی شاہ نے اگلے 15 دن اسٹریٹ کرمنلز کے خلاف سخت آپریشن کرنے کا فیصلہ کیا ہے۔

وزیراعلیٰ سید مراد علی شاہ کی صدارت میں امن امان سے متعلق اہم اجلاس منعقد ہوا جس میں وزیراعلیٰ  انٹیلی جنس بیسڈ آپریشن تیز کرنے کی ہدایت دی۔

کراچی : وزیر اعلٰی سندھ کی صدارت میں امن و امان سے متعلق اجلاس#Sindh #BOLNews pic.twitter.com/uHss7dx69U

— BOL Network (@BOLNETWORK) December 22, 2022

دہشت گرد تنظیمیں ملک میں دوبارہ امن امان خراب کرنا چاہتی ہیں

اجلاس کے دوران مراد علی شاہ نے کہا کہ دہشت گرد تنظیمیں ملک میں دوبارہ امن امان خراب کرنا چاہتی ہیں، ہم اپنے ملک، صوبے اور شہروں میں دہشت گردوں کو دوبارہ اٹھنے نہیں دینگے۔

 وزیراعلیٰ سندھ نے انٹیلی جنس بیسڈ آپریشن تیز کرنے کی ہدایت دیتے ہوئے کہا کہ سندھ پولیس اور دیگر انٹیلی جنس اداروں میں کوآرڈینیشن بڑھانے کا مکینزم بنایا گیا ہے، تمام انٹیلی جنس کے ادارے روزانہ کی بنیاد پر ایک دوسرے رابطے میں رہیں۔

اسٹریٹ کرائم پر وزیراعلیٰ سندھ کی اہم ہدایات

دوسری جانب اجلاس میں وزیراعلیٰ سندھ نے اسٹریٹ کرائم پر بھی پولیس کو اہم ہدایات دیتے ہوئے کہا کہ پولیس اور رینجرز اسٹریٹ کرائم کے خلاف سخت کارروائی کریں۔

وزیراعلیٰ سندھ نے ڈی جی رینجرز کو پیٹرولنگ بڑھانے کی بھی ہدایت دی اور اسٹریٹ کرائم میں پراسیکیوشن کو بھی مزید بہتر کرنے کا فیصلہ کیا۔

وزیراعلیٰ کا سندھ بھر میں غیرقانونی طور پر آنے والے غیرملکیوں کو واپس کرنے کا فیصلہ

دوران اجلاس وزیراعلیٰ نے سندھ بھر میں غیرقانونی طور پر آنے والے غیرملکیوں کو واپس کرنے کا فیصلہ کیا اور شہر کے داخلی اور خارجی روستوں پر نگرانی بڑھانے کا بھی فیصلہ کیا۔

مراد علی شاہ نے مزید کہا کہ اہم مقامات جہاں کرمنلز زیادہ متحرک ہیں وہاں پولیس اور رینجرز کی تعیناتی کی جائے، دسمبر میں ڈکیتیوں کے دوران 7 قتل ہوئے ہیں۔

 وزیراعلیٰ سندھ نے اجلاس میں اگلے 15 دن اسٹریٹ کرمنلز کے خلاف سخت آپریشن کرنے اور روزانہ کی بنیاد پر ہونے والے دہشت گردوں اور اسٹریٹ کرمنلز کے خلاف آپریشن کا ڈیٹا پولیس اور میڈیا سے شیئر کرنے کا بھی فیصلہ کیا ہے۔

اجلاس میں چیف سیکریٹری سہیل راجپوت، ڈی جی رینجرز میجر جنرل اظہر، آئی جی پولیس غلام نبی میمن، پرنسپل سیکریٹری فیاض جتوئی، ایڈیشنل آئی جی سی ٹی ڈی، ایڈیشنل آئی جی اسپیشل برانچ اور دیگر اداروں کے افسران شریک تھے۔