لیگی ممبر صوبائی اسمبلی رانا مشہود کا کہنا ہے کہ نواز شریف عنقریب پاکستان پہنچ رہے ہیں۔

مسلم لیگ (ن) کے رہنما رانا مشہود نے لاہور میں میڈیا سے گفتگو کرتے ہوئے کہا کہ عمران خان کی گھڑی چوری چھپانے کے لیے پنجاب اسمبلی کے اجلاس کو بلڈوز کرنے کی کوشش کی۔

انہوں نے کہا کہ اراکین نے آواز اٹھائی تو ان پر پابندی عائد کردی، انکی جماعت غیر قانونی ہے اور یہ پاکستان کو لوٹنا چاہتے ہیں۔

رانا مشہود نے کہا کہ پاکستان کو آئین اور قانون کے مطابق چلنے دیں، تمھاری چوریاں، ڈکیتیاں اور گوگیاں زبان زد عام ہیں۔

(ن) لیگ رہنما کا کہنا ہے کہ انکو فارن فنڈنگ کیس میں بین ہونا چاہیے، عمران خان کو اب پابند سلاسل ہونا چاہیے۔

رانا مشہود نے مزید کہا کہ نواز شریف عنقریب پاکستان پہنچ رہے ہیں، تمھارا بوریا بستر گول ہورہا ہے۔

لیگی رہنما حنیف عباسی

اس سے قبل لیگی رہنما حنیف عباسی نے لاہور ہائیکورٹ میں میڈیا سے گفتگو کرتے ہوئے کہا کہ نواز شریف ہر صورت وطن واپس آئیں گے، نواز شریف عدالتوں کے سامنے پیش ہوکر سرنڈر کرینگے۔

حنیف عباسی نے مزید کہا کہ روس سے پیٹرول کی خریداری پر بات ہورہی ہے، چھ ماہ میں مہنگائی اور پیٹرول کی قیمتیں کم ہوجائیں گی، حکومت چھ ماہ سے آگے بھی جا سکتی ہے۔

سلمان شہباز کا ملک واپسی فیصلہ

دوسری جانب وزیر اعظم شہباز شریف کے صاحبزادے سلیمان شہباز نے پاکستان واپس آنے کا فیصلہ کر لیا ہے۔

 سلیمان شہباز نے اپنے وکیل کے ذریعے حفاظتی ضمانت کے لیے اسلام آباد ہائی کورٹ میں درخواست دائر کی ہے۔

سلمان شہباز نے وکیل امجد پرویز کے ذریعے اسلام آباد ہائی کورٹ میں درخواست کے ذریعے استدعا کی ہے کہ انہیں دو ہفتے کی حفاظتی ضمانت دی جائے۔

واضح رہے کہ سلیمان کو شریف خاندان کے خلاف منی لانڈرنگ کیس میں اشتہاری قرار دیا گیا تھا اور لاہور کی احتساب عدالت نے ان کے ناقابل ضمانت وارنٹ گرفتاری جاری کیے تھے۔