وزیر اعلیٰ پنجاب چودھری پرویز الٰہی نے ماحول دوست ہائبرڈ بسوں کی خریداری کے عمل کو تیز کرنے کی ہدایت دی ہے۔

تفصیلات کے مطابق وزیراعلیٰ پنجاب چودھری پرویزالٰہی کی زیر صدارت پنجاب ماس ٹرانزٹ اتھارٹی کا 21 واں اجلاس ہوا ہے جس میں ایم ڈی پنجاب ماس ٹرانزٹ اتھارٹی نے بسوں کی خریداری کے عمل کے بارے میں بریفنگ دی۔

اجلاس کی صدارت کرتے ہوئے وزیراعلیٰ پنجاب چودھری پرویز الٰہی نے کہا کہ لاہور میں پہلے مرحلے میں 300 ماحول دوست ہائبرڈ بسیں چلائی جائیں گی۔

انہوں نے کہا کہ نئی بسوں میں خواتین، سپیشل اور نابینا افراد کے لئے علیحدہ سیٹیں مختص کی جائیں گی جبکہ سپیشل اور نابینا افراد کیلئے بس کے دروازے کے قریب سیٹیں بھی مخصوص ہوں گی۔

یہ بھی پڑھیں؛ دریائے چناب پر دو بڑے ڈیمز بنانے کا منصوبہ بنایا ہے، چودھری پرویز الٰہی

ان کا کہنا تھا کہ ماحول دوست ہائبرڈ بسیں چلنے سے ماحولیاتی آلودگی اور سموگ میں کمی ہوگی جبکہ خواتین اور لوگوں کو آمد و رفت کی سستی اور معیاری سہولت بھی ملے گی۔

ان کا یہ بھی کہنا تھا کہ لاہور میں خواتین کے لئے خصوصی بس سٹاپ بھی بنائے جائیں گے۔

یہ بھی پڑھیں؛ معاشرے کی ترقی کے لئے معاشی و سماجی انصاف ضروری ہے، چودھری پرویز الٰہی

وزیر اعلیٰ پنجاب چودھری پرویز الٰہی نے ماحول دوست ہائبرڈ بسوں کی خریداری کے عمل کو تیز کرنے کی ہدایت دیتے ہوئے کہا کہ فیصلوں پر عملدرآمد کے لئے ٹائم لائن مقرر کی جائے، بسوں کی خریداری کے عمل کو جلد مکمل کیا جائے اور تمام ضروری امور جلد طے کر کے رپورٹ پیش کی جائے۔

یہ بھی پڑھیں؛ سرمایہ کاروں کی انوسٹمنٹ کا تحفظ یقینی بنایا جائے گا، چودھری پرویز الٰہی

اجلاس میں پرنسپل سیکرٹری وزیراعلیٰ محمد خان بھٹی، اتھارٹی کے اراکین، ایم پی ایزکرنل (ر) غضنفر عباس شاہ، خدیجہ عمر، شمیم آفتاب، خاور حیات، غزالہ فرید،سیکرٹری ٹرانسپورٹ، چیئرمین پلاننگ اینڈ ڈویلپمنٹ بورڈ، سیکرٹری خزانہ، ایم ڈی پی ایم اے، سیکرٹری پی ایم اے اور متعلقہ حکام نے بھی شرکت کی۔