سربراہ عوامی مسلم لیگ اور پی ٹی آئی کے سینئر رہنما شیخ رشید نے کہا ہے کہ عمران خان 17 دسمبر کو قوم سے خطاب کریں گے۔

تفصیلات کے مطابق پی ٹی آئی کے سینئر رہنما شیخ رشید نے پریس کانفرنس کرتے ہوئے کہا کہ آج خان صاحب سے ملکی صورتحال پر بات چیت ہوئی، اس موقع پر انہوں نے بتایا کہ 17 تاریخ کو آٹھ بجے وہ قوم سے خطاب کریں گے۔

حکومت غیر قانونی ترامیم کرانے کی کوشش میں مشغول ہے

شیخ رشید نے کہا کہ امید ہے کہ خطاب کرتے وقت وہ اسمبلی توڑنے کا اعلان بھی کریں گے، ان کی سیاست کو روکنے کی ناکام کوشش کی جا رہی ہے، چور حکومت غیر قانونی ترامیم کرانے کی کوشش میں مشغول ہے، سپریم کورٹ سے اپیل ہے کہ ان سب کے نام ای سی ایل میں ڈالیں۔

مزید پڑھیں؛ عمران خان کو الگ کرنے سے عدم استحکام دور نہیں ہوگا، استحکام کیلئے الیکشن کرانے ہونگے، شیخ رشید

انہوں نے پریس کانفرنس میں کہا کہ چور بھاگنے کی کوشش کر رہے ہیں، ان کے صرف دو ایجنڈے ہیں اور وہ یہ کہ عمران خان کو نااہل کیا جائے اور نگران سیٹ اپ کو طویل کیا جائے۔

میڈیا سے گفتگو کرتے ہوئے ان کا یہ بھی کہنا تھا کہ عمران خان تو الیکشن کا مطالبہ کر رہے ہیں، چاہے نواز شریف کو بلا لو لیکن الیکشن کراؤ۔

یہ بھی پڑھیں؛ پی ڈی ایم کیلئے عوام کے آگے ہتھیار ڈالنے کا آخری موقع ہے، شیخ رشید

ملک معاشی طور پر ڈوب رہا ہے

انہوں نے کہا کہ بارڈر کی صورت حال خراب ہو رہی ہے، ملک معاشی طور پر ڈوب رہا ہے، سیاست میں دروازے بند نہیں ہو سکتے، اس وقت سیاسی عدم استحکام ہے، اگر مذاکرات میں کامیابی آنی ہے تو یہی ہفتہ ہے۔

واضح رہے کہ کچھ دیر قبل سابق وفاقی وزیر داخلہ شیخ رشید نے زمان پارک لاہور میں پی ٹی آئی چیئرمین عمران خان سے ملاقات کی جس میں ملکی مجموعی سیاسی صورتحال پر تبادلہ خیال کیا گیا۔

ذرائع کا کہنا ہے کہ ملاقات کے دوران صوبائی اسمبلیاں تحلیل کرنے یا استعفوں کے معاملے پر بات چیت کی گئی جبکہ ملک میں بڑھتی ہوئی مہنگائی اور ملکی معیشت پر بھی تبادلہ خیال کیا گیا۔