سندھ حکومت نے کراچی میں ٹریفک کی روانی بہتر بنانے سے متعلق اہم فیصلہ کرلیا۔

تفصیلات کے مطابق سندھ حکومت کا کراچی میں ٹریفک کی روانی بہتر بنانے سے متعلق اہم  اجلاس ہوا جس میں کمشنر کراچی، سیکریٹری داخلہ، سیکریٹری ٹرانسپورٹ اور ڈی آئی جی ٹریفک سمیت دیگر متعلقہ حکام شریک ہوئے۔

اجلاس میں کراچی میں ہیوی ٹریفک پر پابندی پر سختی سے عمل درآمد  کرنے کا فیصلہ کرلیا گیا۔

مزید پڑھیں: عدالتی احکامات کیخلاف کراچی میں دن کے اوقات میں ہیوی ٹریفک کا داخلہ جاری

اجلاس میں فیصلہ کیا گیا کہ  کالے شیشے والی گاڑیوں، سائرن، بار لائٹس اور غیر قانونی نمبر پلیٹس کے استعمال کے خلاف کریک ڈاؤن  کیا جائے گا۔

چیف سیکریٹری سندھ  نے ڈی آئی جی ٹریفک  کو ہدایت کی کہ فینسی نمبر پلیٹ والی گاڑیوں کو قبضے میں لیا جائے۔ ٹریفک قوانین کی خلاف ورزی پر  جرمانہ عائد کیا جائے۔

چیف سیکریٹری سندھ نے کمشنر کراچی کو ہدایت کی کہ غیر قانونی فینسی نمبر پلیٹ بنانے والوں کے خلاف بھی آج سے کارروائی  شروع کی جائے۔

مزید پڑحیں: سندھ ہائیکورٹ کا شہرمیں ہیوی ٹریفک پر پابندی کے حکم پرعملدرآمد کرنے کا بڑا حکم

ڈپٹی کمشنر ایسٹ کو چیف سیکریٹری سندھ نے ہدایت کی کہ یونیورسٹی روڈ کے سروس روڈ سے ہر قسم کی پارکنگ کو ہٹایا جائے۔

ڈی آئی جی ٹریفک نے بریفنگ دی کہ رواں سال اب تک 15 ہزار 704 ڈرائیورز کو خلاف ورزی پر گرفتار کیا گیا ہے۔ اب تک 3421  گاڑیوں کا فٹنس سرٹیفکیٹ معطل کیا گیا ہے۔

ڈی آئی جی ٹریفک نے بتایا کہ  ٹریفک قوانین کی خلاف ورزی کے چالان کی رقم دیگر صوبوں میں سندھ سے زیادہ ہےجس پر  چیف سیکریٹری سندھ ڈاکٹر محمد سہیل راجپوت نے کہا کہ  جلد جرمانے کی رقم بھی بڑھائی جائے گی۔

اجلاس میں   چالان کے ڈیٹا کو بھی ڈرائیونگ لائسنس کے ساتھ منسلک کرنے کا  فیصلہ کرلیا گیا۔سیکریٹری ایکسائیز، سیکریٹری آئی ٹی، ڈی آئی جی ٹریفک، ڈی آئی جی ڈرائیونگ لائسنس پر مشتمل کمیٹی قائم کردی گئی۔