پنجاب میں بلدیاتی انتخابات بائیومیٹرک طریقے سے کرانے کی درخواست پر سماعت  ہوئی۔

تفصیلات کے مطابق پنجاب کے بلدیاتی انتخابات بائیومیٹرک طریقے سے کرانے اور اوورسیز پاکستانیوں کو ووٹنگ کا حق دینے کی درخواست پرسماعت ہوئی۔

عدالت نے درخواست گزار کو سپریم کورٹ کے احکامات کی کاپی عدالت کو فراہم کرنے کی ہدایت کردی۔

الیکشن کمیشن کے وکیل نے دلائل دیتے ہوئے کہا کہ  اسی نوعیت کاکیس سپریم کورٹ اور عدالت عالیہ کے دوسرے بینچ میں بھی زیر التواء ہے۔ سافٹ ویئر اور دیگر آلات کی خریداری کے لیے پیسہ اور وقت درکار ہے جس پر عدالت نے کہا کہ  دیکھنا یہ ہے کہ فوری طورپر کس طرح سے عمل ہوگا۔

مزید پڑھیں: بلوچستان: بلدیاتی انتخابات کے دوسرے مرحلے کا آغاز

درخواست گزار ندیم یوسف کےوکیل اظہر صدیق ایڈووکیٹ نے دلائل  دیتے ہوئے کہا کہ  الیکشن کمیشن خود بائیو میٹرک نظام میں روڑے اٹکا رہا ہے۔ الیکشن کمیشن سیاسی جماعتوں کے ہاتھوں میں کھیل رہا ہے۔

درخواست میں موقف اپنایا گیا کہ  الیکشن کمیشن نے آج تک بائیو میٹرک نظام کے نفاذ کے لیے سنجیدہ کوشش ہی نہیں۔ اوورسیز پاکستانی ملک کا قیمتی سرمایہ ہیں مگر انہیں ووٹ کے بنیادی حق سے محروم رکھا گیا ہے۔

مزید پڑھیں: الیکشن کمیشن کا پنجاب میں بلدیاتی انتخابات اپریل کے آخری ہفتے میں کرانے کا فیصلہ

درخواست گزار کے وکیل نے مزید کہا کہ  اوورسیز پاکستانی قیمتی زرمبادلہ پاکستان بھجواتے اور ملکی ترقی میں اہم کردار ادا کر رہے ہیں۔ اوورسیز پاکستانیوں کو ووٹ کے حق سے محروم کرنا بنیادی حقوق کی سنگین خلاف ورزی ہے۔

انہوں نے مزید کہا کہ  بائیو میٹرک نظام کے ذریعے ووٹنگ کرا کے بیرون ملک پاکستانیوں کو ووٹ کا حق دلایا جا سکتا ہے۔

درخواست گزار کے وکیل نے عدالت سے استدعا کی  عدالت بیرون ملک مقیم پاکستانیوں کو بائیو میٹرک ووٹنگ کا اہل قرار دے اور  پنجاب کے بلدیاتی انتخابات بائیومیٹرک طریقے سے کرانے کے بھی احکامات صادر کرے۔