ترجمان پی ٹی آئی سندھ و رکن صوبائی اسمبلی ارسلان تاج نے کہا ہے کہ ایم کیو ایم اور پیپلزپارٹی کو عوام سے کوئی غرض نہیں ہے۔

تفصیلات کے مطابق ترجمان پی ٹی آئی سندھ و رکن صوبائی اسمبلی ارسلان تاج نے کراچی میں نئے ایڈمنسریٹر کی تعیناتی کے معاملے پر ردعمل دیتے ہوئے کہا کہ ہم کسی بھی سیاسی جماعت کے سیاسی ایڈمنسٹریٹر کو مسترد کرتے ہیں۔

انہوں نے کہا کہ مرتضیٰ وہاب بھی سیاسی جماعت کے نمائندے کی حیثیت سے کام کرتے رہے جبکہ نئے سیاسی ایڈمنسٹریٹر کی تعیناتی  آو مل کر کھاتے ہیں کا تسلسل ہے۔

ان کا کہنا تھا کہ ایم کیو ایم کے امپورٹڈ حکومت میں شامل ہونے کی وجوہات سامنے آرہی ہیں، ایم کیو ایم کی باقیات اپنا حصہ وصول کر رہی ہیں جبکہ ہمارے علم میں ہے کہ ڈسٹرکٹ سطح پر بھی سیاسی ایڈمنسٹریٹرز کی تعیناتیاں کی جائیں گی۔

  ارسلان تاج نے کہا کہ ایم کیو ایم اور پیپلزپارٹی کو عوام سے کوئی غرض نہیں ہے، دونوں جماعتیں ذاتی مفادات کو مدنظر رکھے ہوئے ہیں۔

انہوں نے کہا کہ ایم کیو ایم کے اندر اپنے وسائل  کے جھگڑے چل رہے ہیں۔

ان کا کہنا تھا کہ پیپلز پارٹی کے ساتھ مل کر کراچی کے مسائل نہیں حل کیے جاسکتے، کراچی کے مسائل منتخب عوامی نمائندہ ہی حل کرسکتا ہے۔

ترجمان پی ٹی آئی سندھ و رکن صوبائی اسمبلی ارسلان تاج نے مزید کہا کہ بلدیاتی انتخابات سے دونوں جماعتیں خائف ہیں، یہ جانتے ہیں کہ بلدیاتی انتخابات میں انھیں بہت بری شکست ہوگی۔