امیر جماعت اسلامی کراچی و صدر الخدمت کراچی حافظ نعیم الرحمن نے کہا ہے کہ الخدمت کا بنو قابل پروگرام نوجوانوں کو ان پاور کرنے اور آگے بڑھانے کیلئے ہے۔

تفصیلات کے مطابق امیر جماعت اسلامی کراچی و صدر الخدمت کراچی حافظ نعیم الرحمن نے الخدمت ”بنو قابل میگا پروجیکٹ“ کے تحت باغ جناح گراؤنڈ میں کراچی کے تعلیم یافتہ طالبات کے لیے آئی ٹی کورسز کے انٹری ٹیسٹ کے موقع پر ان سے خطاب کرتے ہوئے کہا کہ آپ سب کو مبارکباد پیش کرتا ہوں کہ اتنی بڑی تعداد میں کراچی کی بیٹیاں یہاں موجود ہیں۔

امیر جماعت اسلامی نے کہا کہ وہ سارے لوگ جو قوم کو جاہل بنانا چاہتے ہیں ان سب کو کراچی کی بیٹیوں نے مزار قائد پرجمع ہو کر پیغام دے دیا ہے کہ ہم علم کی روشنی میں آگے بڑھیں گی، الخدمت کے بنو قابل پروجیکٹ میں فری اسکالر شپ اور ملازمت کا پورا نظام موجود ہے۔

نعیم الرحمن نے کہا کہ ملک کی تمام حکومتی جماعتیں 75 سال کا کام جمع کر لیں اور آج کی طالبات کا عزم ایک جگہ ہے، جماعت اسلامی کراچی کے نوجوانوں کو پڑھانا چاہتی ہے، حکومت کی طرف سے صرف دو کالجز موجود ہیں، ۳۲۶ ارب روپے کا تعلیمی بجٹ ہے پر پھر بھی پری انجینئرنگ میں کوئی بھی طالب علم پاس نہیں ہو سکا، کراچی کے ٹیکسوں کے پیسوں سے کراچی کا بجٹ بنتا ہے جو کراچی کے عوام پر خرچ نہیں ہوتا۔

ان کا کہنا تھا کہ آج کا تاریخی ایپٹیٹیوٹ ٹیسٹ پیغام ہے کہ ہم پڑھانے کے ساتھ ساتھ حساب بھی مانگیں گے، کراچی کے لڑکے اور لڑکیاں ان حکمرانوں سے پوچھیں گے کہ کیوں ہمیں جاہل بناتے ہو جبکہ پڑھانا تو تمھاری ذمہ داری ہے، ہم تو کراچی کے طلبہ و طالبات کو پڑھانے کے ساتھ ساتھ انٹری ٹیسٹ میں پاس ہونے والے ہر طالبہ کو فری اسکالر شپ دیں گے۔

انہوں نے کہا کہ کراچی میں جماعت اسلامی کا میئر آئے گا تو کراچی میں ماڈل اسکولز بنائیں گے اور آئی ٹی کی اسکالر شپ شروع کریں گے۔