مسلم لیگ ق نے پارٹی سربراہی سے متعلق الیکشن کمیشن سے محفوظ فیصلہ سنانے کی استدعاء کردی ہے۔

تفصیلات کے مطابق چوہدری شجاعت کی مسلم لیگ ق کی پارٹی سربراہی کے معاملے پر کامل علی آغا کی جانب سے وکیل عامر سعید راں الیکشن کمیشن میں پیش ہوئے۔

انہوں نے بتایا کہ چوہدری شجاعت اور طارق بشیر چیمہ کو پارٹی عہدوں سے ہٹانے کا کیس الیکشن کمیشن میں ہے اور اس کیس کا محفوظ فیصلہ تاحال نہیں سنایا گیا ہے۔

یہ بھی پڑھیں: الیکشن کمیشن نے چوہدری شجاعت حسین کو پارٹی سربراہ برقرار رکھنے کا حکم دیدیا

انہوں نے بتایا کہ پنجاب اسمبلی کی تحلیل کے باعث سیاسی گہما گہمی ہے اور پنجاب اسمبلی کے انتخابات کے حوالے سے مسلم لیگ ق کی جانب سے امیدواروں کو ٹکٹ جاری کرنے ہیں تاہم درخواست ہے کہ الیکشن کمیشن پارٹی سربراہی سے متعلق محفوظ فیصلہ جلد سنائے۔

اس معاملے پر الیکشن کمیشن کا کہنا تھا کہ اس معاملے کو دیکھ لیتے ہیں۔

خیال رہے کہ الیکشن کمیشن کی جانب سے ق لیگ کی سربراہی سے متعلق درخواستوں پر فیصلہ محفوظ کیا گیا تھا۔

واضح رہے کہ گزشتہ روز مسلم لیگ ق کے صدرچوہدری شجاعت حسین نے پارٹی کے صوبائی صدر اور وزیراعلیٰ پنجاب چوہدری پرویز الہیٰ کی پارٹی رکنیت معطل کردی۔

چوہدری شجاعت حسین نے پرویز الہیٰ کو شوکاز نوٹس بھی جاری کردیا۔

نوٹس میں کہا گیا کہ پاکستان مسلم لیگ بحثیت سیاسی جماعت اپنا تشخص، ووٹ بنک، پارٹی ڈسپلن اور منشور وضابطہ رکھتی ہے،  آپ کے خلاف پارٹی آئین کے آرٹیکل نمبر 16 اور آرٹیکل نمبر 50 کے تحت کاروائی عمل میں لائی جائے گی اور آپ کی وضاحت تک آپکی پارٹی کی بنیادی رکنیت معطل کر دی جاتی ہے۔

واضح رہے کہ چوہدری پرویز الہیٰ نے اپنی جماعت کو پی ٹی آئی میں ضم کرنے کے حوالے سے پارٹی اراکین سے مشاورت مکمل کرلی اس حوالے سے وہ جلد ہی اعلان کریں گے۔

یہ بھی پڑھیں؛ ق لیگ کا پی ٹی آئی میں ضم ہونے کا حتمی فیصلہ