وفاقی وزیر منصوبہ بندی ترقی و اصلاحات و خصوصی اقدامات پروفیسر احسن اقبال نے کہا ہے کہ عمران خان کو ووٹ کی طاقت سے عبرت ناک شکست دیں گے۔

تفصیلات کے مطابق احسن اقبال نے میڈیا سے گفتگو کرتے ہوئے کہا کہ اب ہمیں ٹکڑا ٹکڑا کر کے پاکستان کو جوڑنا ہے، پاکستان کا مستقبل تابناک ہے، ہمیں اس انتشار کے سفر سے نکلنا ہے جس کو عمران خان نے مسلط کیا ہے، پوری قوم کو متحد کریں گے اور ایک نئی تاریخ رقم کریں گے، الیکشن کرانے کا طریقہ کار آئین میں موجود ہے، الیکشن کمیشن سے جو حلقے خالی ہوئے ان کا طریقہ کار جاری کیا ہے، اس وقت کچھ آئینی مسائل بھی ہیں۔

احسن اقبال نے کہا کہ کیا آدھے ملک کا انتخاب پرانی مردم شماری پر اور آدھے ملک کا انتخاب نئی مردم شماری پر ہو گا؟َ الیکشن کمیشن نوے دن میں الیکشن کروائے یا اکتوبر میں عام انتخابات ہم سب کے لئے تیار ہیں، ووٹ کی طاقت سے عمران خان کو عبرت ناک شکست دیں گے، کارکنوں کا جوش اور ولولہ بے مثال ہے، مریم نواز نواز شریف علامت بن کر واپس آئی ہیں۔

ان کا کہنا تھا کہ مریم نواز کو نواز شریف نے چیف آرگنائزر مقرر کیا ہے تاکہ وہ پارٹی کی تنظیم نو میں فعال کردار ادا کریں، مریم نواز پارٹی کو موبلائز کریں گی وہ نواز شریف کی واپسی میں فعال کردار ادا کریں گی، نواز شریف کی قیادت میں ن لیگ وہی کردار ادا کرے گی جو ہم نے 2013 میں ادا کیا تھا، آج پاکستان جن حالات سے گزر رہا ہے اس کی وجہ وہ سازش ہے جو کر کے نواز شریف کو 2017 میں نکالا گیا، ایک اناڑی اور نالائق شخص جس کا نام عمران خان ہے کو پاکستان پر مسلط کیا گیا۔

ضرور پڑھیں؛ چوتھے صنعتی انقلاب کے لیے نوجوانوں کو تعلیم اور ٹریننگ فراہم کرنا ترجیح ہے، احسن اقبال