لاہور: نگراں وزیر اعلیٰ پنجاب کی تقرری کے لئے 6 رکنی پارلیمانی کمیٹی تشکیل دے دی گئی ہے۔

تفصیلات کے مطابق اسپیکر پنجاب اسمبلی سبطین خان نے 6 رکنی  پارلیمانی کمیٹی کی تشکیل کر دی جس کا نوٹیفکیشن بھی جاری کردیا گیا ہے۔

جاری کردہ نوٹیفکیشن میں بتایا گیا کہ کمیٹی میں حکومتی اتحاد اور متحدہ اپوزیشن کے تین تین اراکین شامل ہیں۔

نوٹیفکیشن کے مطابق کمیٹی میں حکومت بینچوں سے میاں اسلم اقبال، راجہ بشارت اور ہاشم جواں بخت شامل ہیں جبکہ متحدہ اپوزیشن کی جانب سے ملک احمد خان، حسن مرتضیٰ اور ملک ندیم کامران کمیٹی میں شامل ہیں۔

نوٹیفکیشن میں مزید کہا گیا کہ پارلیمانی کمیٹی 3 روز میں نگراں وزیراعلیٰ  پنجاب کے ناموں پر مشاورت کرے گی۔

واضح رہے کہ نگراں وزیر اعلیٰ پنجاب پر بنانے والی کیمٹی کی پہلی میٹنگ جمعے کو 2 بجے پنجاب اسمبلی میں ہوگی جس میں نگراں وزیر اعلیٰ کے ناموں پر مشاورت کرے گی۔

اپوزیشن ارکان کی پارلیمانی کمیٹی اجلاس سے قبل مشاورت

دوسری جانب نگراں وزیر اعلیٰ کی تقرری کے معاملے پر متحدہ اپوزیشن ارکان نے پارلیمانی کمیٹی اجلاس سے قبل مشاورت کی۔

یہ بھی پڑھیں؛ اپوزیشن نے نگراں وزیر اعلیٰ کے نام پر بھی سیاست چمکانے کی کوشش کی، پرویز الٰہی

متحدہ اپوزیشن ممبر سید حسن مرتضیٰ، ملک ندیم کامران اور ملک احمد خان کے درمیاں رابطہ ہوا جس میں ارکان نے پارلیمانی کمیٹی اور نگراں وزیر اعلیٰ کے ناموں پر غوروخوص کیا۔

حکومت اور اپوزیشن میں ڈیڈ لاک برقرار

علاوہ ازیں نگراں وزیر اعلیٰ کی تقرری کے معاملے پر حکومت اور اپوزیشن میں ڈیڈ لاک برقرار ہے۔

تاحال مشاورتی عمل کا آغاز نہ ہوسکا، حکومت کی جانب سے پارلیمانی کمیٹی کے لیے نامزد ممبران پنجاب اسمبلی پہنچ گئے تھے۔

میاں اسلم اقبال، راجہ بشارت اور ہاشم جواں بخت پنجاب اسمبلی پہنچے جبکہ اپوزیشن کی جانب سے تاحال کوئی ممبر بھی پنجاب اسمبلی نہ پہنچا۔

واضح رہے کہ گزشتہ روز پنجاب اسمبلی تحلیل ہونے کے بعد نگراں وزیراعلیٰ کا تقرر نہیں کیا جا سکا تھا جس کی وجہ سے یہ معاملہ پارلیمانی کمیٹی کے پاس چلا گیا تھا۔

نگراں وزیر اعلیٰ پنجاب کے لئے پرویز الٰہی اور حمزہ شہباز کے درمیان اتفاق نہیں ہوا تھا جس کے بعد گورنر پنجاب سے پارلیمانی کمیٹی تشکیل دیے جانے کی استدعا کی گئی تھی۔

گورنر پنجاب بلیغ الرحمان کی جانب سے پارلیمانی کمیٹی بنانے کیلئے اسپیکر پنجاب اسمبلی کو خط لکھ دیا گیا تھاتاہم پارلیمانی کمیٹی فیصلہ نہیں کرسکی تو معاملہ الیکشن کمیشن کے پاس چلا جائے گا۔