وزیر اعظم شہباز شریف نے 3 روزہ ملک گیر انسداد پولیو مہم کا آغاز کر دیا ہے جس کے تحت ملک بھر میں پانچ سال سے کم عمر کے بچوں کو پولیو کے قطرے پلائے جائیں گے۔

اس موقع پر میڈیا سے گفتگو کرتے ہوئے وزیر اعظم شہباز شریف نے اس یقین کا اظہار کیا کہ وفاقی حکومت کے ساتھ تمام صوبائی حکومتیں ملک سے پولیو وائرس کے مکمل خاتمے کی مہم میں بڑھ چڑھ کر حصہ لیں گی۔

سیلاب کی وجہ سے انسداد پولیو مہم متاثر ہوئی

انہوں نے کہا کہ سیلاب کی وجہ سے انسداد پولیو مہم متاثر ہوئی، گزشتہ چند ماہ میں وزیرستان سے پولیو کے 20 کیسز سامنے آئے، نواز شریف دور میں ملک سے پولیو کا خا تمہ ہوگیا تھا۔

یہ بھی پڑھیں: پولیو کے خاتمےکیلئے بل گیٹس کی جانب سے تعاون اور حمایت پرمشکور ہیں، وزیراعظم

پولیو ورکرز کو شاندار خراج تحسین پیش کرتے ہوئے شہباز شریف نے کہا کہ جنہوں نے وبا کے خلاف اس جنگ میں اپنی جانیں نچھاور کیں، پولیو فری پاکستان کے مقصد کے حصول میں ان کی قربانیوں کو یاد رکھا جائے گا۔

وزیر اعظم نے بل اینڈ میلنڈا گیٹس فاؤنڈیشن اور ورلڈ ہیلتھ آرگنائزیشن سمیت تمام اسٹیک ہولڈرز کا بھی شکریہ ادا کرتے ہوئے کہا کہ انہوں نے اس بیماری کے خاتمے میں پاکستان کی حمایت اور تعاون کے عزم کا اظہار کیا۔

واضح رہے کہ وزیر اعظم شہباز شریف نے اسلام آباد میں رواں سال کی پہلی انسداد پولیو مہم کا افتتاح کرتے ہوئے انہوں نے بچوں کو پولیو کے قطرے پلائے۔

اس موقع پر وزیراعظم نے پولیو ورکرز اور بچوں میں تعریفی خطوط اور تحائف بھی تقسیم کیے۔