سابق وفاقی وزیر شاہ محمود قریشی نے کہا ہے کہ آئین میں درج قائد حزب اختلاف کی تشریح آج دفن ہوگئی۔

بول نیوز سے گفتگو کرتے ہوئے شاہ محمود قریشی نے کہا کہ جانبدار نگراں وزیراعلیٰ کی تعیناتی پر احتجاج ریکارڈ کرارہے ہیں، ہماری خواہش شفاف الیکشن ہیں۔

انہوں نے کہا کہ ایسی شخصیات کے نام دیے جن کے ساتھ ن لیگ کام کرچکی تھی، حکومت من پسند لوگوں کو لاکر مرضی کے نتائج چاہتی ہے۔

سابق وفاقی وزیر نے کہا کہ حکومت کو ایسا قائد حزب اختلاف چاہیے تھا جو انگوٹھا لگا سکے، ایسا بندہ چاہیے تھا جو حکومت کا ایجنڈا آگے بڑھا سکے۔

شاہ محمود قریشی نے مزید کہا کہ قانونی چارہ جوئی اور عوام کو متحرک کریں گے۔ آئین میں درج قائد حزب اختلاف کی تشریح آج دفن ہوگئی، حکومت نے نگراں سیٹ اپ کو دفن کردیا ہے۔

یہ بھی پڑھیں؛ ملک کی معاشی صورتحال کے ذمہ دار موجودہ حکمران ہیں، شاہ محمود قریشی

گزشتہ روز بھی سابق وفاقی وزیر شاہ محمود قریشی نے بول نیوز سے گفتگو کرتے ہوئے کہا تھا کہ وزیراعظم شہباز شریف قومی اسمبلی میں اکثریت کھو چکے ہیں، وہ اعتماد کا ووٹ لینے کی پوزیشن میں نہیں ہیں۔

شاہ محمود قریشی نے کہا کہ ہم اسمبلی سے لاتعلق ہوچکے ہیں لیکن حکومتی چالوں میں رکاوٹ ڈالنے کیلئے واپس آرہے ہیں۔

انہوں نے کہا کہ اس وقت ہمارے پاس اتنے نمبر موجود ہیں کہ اپوزیشن لیڈر اپنا لاسکیں کیونکہ موجودہ اپوزیشن لیڈر صرف نام کے ہیں، وہ اپنا کوئی کردار ادا نہیں کررہے ہیں۔

یہ بھی پڑھیں؛ پی ڈی ایم کے پاس پاکستان کیلئے بڑے فیصلے لینے کا مینڈیٹ نہیں ہے، شاہ محمود قریشی

انہوں نے مزید کہا کہ موجودہ سیٹ اپ الیکشن نہیں کرانا چاہتا اور الیکشن کمیشن اپنی آئینی ذمہ داری نہیں نبھارہا جبکہ صاف اورشفاف انتخابات کرانا الیکشن کمیشن کی ذمہ داری ہے۔

شاہ محمود قریشی کا کہنا تھا کہ نگراں وزیراعلیٰ پنجاب کے فیصلے پر مایوسی ہوئی ہے، اس معاملے پرعمران خان قانونی معاملات پر گفتگو کرینگے۔