امیر جماعت اسلامی کراچی حافظ نعیم الرحمان نے کہا ہے کہ جعلی ووٹر لسٹیں بنانے والے الیکشن سے بھاگ رہے ہیں۔

جماعت اسلامی کے امیر حافظ نعیم الرحمان نے کراچی میں میڈیا سے گفتگو کرتے ہوئے کہا کہ کراچی کو حق دو، 5 جنوری کو وزیر اعلیٰ ہاؤس پر دھرنا دیں گے۔

انہوں نے کہا کہ سندھ حکومت نے الیکشن کمیشن کو لکھا گیا خط واپس نہیں لیا، سندھ حکومت کو خط کی واپسی کیلئے 24گھنٹے کا وقت دیا تھا۔

حافظ نعیم الرحمان نے مزید کہا کہ بلدیاتی الیکشن کسی صورت ملتوی نہیں ہونے دیں گے، پیپلزپارٹی اور ایم کیوایم نورا کشتی کررہے ہیں، ان اتحادیوں نے ہمیشہ کراچی کا بیڑہ غرق کیا ہے۔

جماعت اسلامی نے کراچی میں 15 جنوری کو بلدیاتی الیکشن کرانے کی ڈیڈلائن دیدی

گزشتہ روز امیر جماعت اسلامی کراچی حافظ نعیم الرحمان نے بلدیاتی الیکشن ہر صورت 15 جنوری کو کرانے کی ڈیڈ لائن دیدی تھی۔

جماعت اسلامی کے امیر حافظ نعیم الرحمان نے کراچی میں میڈیا سے گفتگو کرتے ہوئے کہا تھا کہ  بلدیاتی انتخابات ملتوی کرنے کی کوشش کی جارہی ہے، بلدیاتی الیکشن ہر صورت 15 جنوری کو ہونے چاہئیں۔

انہوں نے کہا کہ سندھ حکومت کو 24 گھنٹے کا وقت دے رہے ہیں، سندھ حکومت الیکشن کمیشن کو لکھا گیا خط واپس لے، اگر خط واپس نہ لیا تو سی ایم ہاؤس کے باہراحتجاج کرینگے۔

ایم کیو ایم نے اس وقت حلقہ بندیوں کا مسئلہ کیوں نہیں اٹھایا؟

حافظ نعیم الرحمان نے کہا کہ پی ٹی آئی نے کراچی سے ووٹ لیے لیکن پھر واپسی نہیں دیکھا، پی ٹی آئی کراچی کیلئے کوئی پروجیکٹ نہیں لائے۔

انہوں نے کہا کہ رجیم چینج پر ایم کیو ایم نے کراچی کا مینڈیٹ بیچا، ایم کیوایم نے اس وقت حلقہ بندیوں کا مسئلہ کیوں نہیں اٹھایا؟

امیر جماعت اسلامی کا کہنا ہے کہ کامران ٹیسوری کی تقرری میں پی ٹی آئی سمیت سب شامل ہیں، کامران ٹیسوری بھان متی کا کنبہ جوڑ رہے ہیں۔

حافظ نعیم الرحمان نے مزید کہا کہ کامران ٹیسوری پر کرمنل کیسز ہیں، جوڑ توڑ سے لگ رہا ہے کامران ٹیسوری کسی مشن پر آئے ہیں، انکے گورنر بننے کے بعد سازشیں زیادہ بڑھ گئیں۔