کراچی پولیس میں اصلاحات اور جدت پر تیزی سے کام جاری ہے، پولیس نے اسمارٹ کار تیار کر لی۔

تفصیلات کے مطابق پولیس حکام کا کہنا ہے کہ اسمارٹ کار تیار کر لی گئی ہے جو جلد سڑکوں پر دکھائی دے گی۔

پولیس حکام کا کہنا ہے کہ اسمارٹ کار کی چھت پر ہائی ریزولوشن ریوالونگ کیمرہ نصب ہے۔ اسمارٹ کار پر لگا کیمرہ پولیس کے کمانڈ اینڈ کنٹرول روم سے منسلک ہوگا۔

مزید پڑھیں: لاہور پولیس نے شہریوں کے تحفظ سے ہاتھ اٹھا لیے

کار میں وائر لیس سسٹم کے علاوہ تلاش اور تصدیقی  ڈیوائس بھی موجود ہوگی۔ اسمارٹ کار میں دو افسر تعینات ہوں گے  جن میں سے ایک افسر خود گاڑی ڈرائیو کرے گا جبکہ  ایک افسر کی باڈی پر بھی کیمرہ نصب ہوگا۔ اسمارٹ کار پر تعینات افسران تعلیم یافتہ اور خوش اخلاق ہوں گے۔

پولیس حکام کا کہنا ہے کہ پہلی اسمارٹ کار ڈیفنس تھانے کے حوالے کی جائے گی۔ تلاش ایپ کے ذریعے مشتبہ افراد کو چیک کیا جائے گا۔

پولیس حکام کا مزید کہنا ہے کہ تصدیق ایپ کا فیصلہ پوش علاقوں کے گھروں میں چوری کی وارداتوں اور ان میں اکثر گھریلو ملازمین کے ملوث ہونے پر کیا گیا۔ تصدیق ڈیوائس کے ذریعے ڈور ٹو ڈور جاکر گھریلو ملازمین کے کوائف حاصل کر کے ان کی تصدیق کی جائے گی۔

مزید پڑھیں: ریلوے کو ای پولیسنگ کی ضرورت ہے

پہلے مرحلے میں کلفٹن ڈویژن کو اسمارٹ کاریں فراہم کی جائیں گے۔شاہراہ فیصل پر گشت کے لیے بھی اسمارٹ کار استعمال کی جائے گی۔ مرحلہ وار پورے شہر کے تھانوں کو اسمارٹ کار فراہم کی جائے گی۔

پولیس حکام کا کہنا ہے کہ  رفتہ رفتہ پرانی اور بوسیدہ پولیس موبائلوں کو آف روڈ کیا جائے گا۔صرف شہر کے مضافاتی علاقوں میں پولیس موبائیلیں استعمال کی جائیں گی۔ یہ اقدام تھانہ کلچر کو تبدیل کرنے کا تسلسل ہے ۔