پنجاب اور خیبرپختونخوا میں صوبائی حکومت ختم ہونے کے بعد انتخابات کی تاریخ کیلئے  گورنرز کو دوسرا خط لکھ دیا گیا ہے۔

تفصیلات کے مطابق الیکشن کمیشن آف پاکستان کی جانب سے انتخابات کی تاریخ کیلئے گورنر پنجاب اور گورنر خیبرپختونخوا کو ایک بار پھر خط لکھ دیا گیا ہے۔

خط میں کہا گیا ہے کہ پنجاب اسمبلی 14 جنوری کو تحلیل ہوئی تھی اور جبکہ خیبرپختونخوا اسمبلی 18 جنوری کو تحلیل ہوئی تاہم دونوں گورنر کی جانب سے تاحال الیکشن کی تاریخ نہیں دی گئی ہے۔

یہ بھی پڑھیں: صوبائی اسمبلیوں کی تحلیل پر الیکشن کب اور کتنی نشستوں پر ہونگے؟

خط کے مطابق الیکشن کمیشن نے کہا ہے کہ آرٹیکل 105 کے تحت تحلیل کی صورت میں گورنرکا الیکشن کی تاریخ دینا ضروری ہے۔

واضح رہے کہ الیکشن کمیشن نے گورنر پنجاب اور خیبرپختونخوا کو 24 جنوری کو خط لکھے تھے تاہم گورنرز کی جانب سے تاحال الیکشن کمیشن کے خطوط کے جواب نہیں دیئے گئے ہیں۔

خط میں کہا گیا کہ پنجاب میں انتخابات 13 اپریل سے پہلے بنانے لازمی ہیں، پنجاب میں انتخابات کیلئے 9 اپریل سے 13 اپریل کی تاریخ موضوں ہے، گورنر پنجاب 9 اپریل سے 13 اپریل کے درمیان کی تاریخ الیکشن کیلئے اناؤنس کریں۔

الیکشن کمیشن نے کہا کہ خیبرپختونخوا کی اسمبلی 18 جنوری کو تحلیل کی گئی، خیبر پختونخوا میں انتخابات کیلئے 15 اپریل سے 17 اپریل تک کی تاریخ تجویز کی جاتی ہے۔

خط میں مزید کہا گیا کہ گورنر خیبرپختونخوا انتخابات کیلئے 15 سے 17 اپریل لے درمیان کی تاریخ الیکشن کیلئے انائونس کریں۔

دوسری جانب لیکشن کمیشن کی جانب سے عام انتخابات کے لئے ضابطہ اخلاق پر سیاسی جماعتوں سے مشاورت کا فیصلہ کیا گیا ہے۔

الیکشن کمیشن نے 21 بڑی سیاسی جماعتوں کے سربراہان کو 2 فروری کو بلا لیا ہے، الیکشن کمیشن کی جانب سے 21 جماعتوں کو دعوت نامے بھی ارسال کردیے گئے ہیں۔

چیف الیکشن کمشنر کی زیر صدارت اجلاس 2 فروری دن 2 بجے ہوگا جس میں الیکشن کمیشن سیاسی جماعتوں سے ضابطہ اخلاق پر مشاورت اور تجاویز مانگے گا۔

یہ بھی پڑھیں: الیکشن کمیشن کا عام انتخابات سے متعلق نیا سسٹم لانے کا فیصلہ